Joe Chetcuti

L-2008

2008-12-27T13:09:00.013+01:00

Din hi l-aħħar kontribuz¬zjoni tiegħi għall-2008 u allura xieraq li ndur dawra ħafif magħha qabel titlaq. Sena tal-kuntrasti u l-kontroversji. Qabel xejn, l-2008 kienet is-sena tal-Elezzjoni Ġenerali. Li kellha, skont kif ingħatajna x’nifhmu, tintrebaħ b’mod l-aktar komdu mil-Labour, imma li reġgħu rebħu n-Nazzjonalisti biex se jkunu għamlu 25 sena fil-Gvern. Kienet ukoll is-sena li matulha jekk il-bidla f’Malta ma seħħitx, fl-Istati Uniti tal-Amerika mhux biss rajniha sseħħ b’mod kolossali talli rajna l-istorja tinkiteb.

Hija ukoll is-sena tal-kriżi finan¬zjarja dinjija li tefgħetna f’riċessjoni li mistennija tilħaq il-kulminu tagħha fl-2009. U s-sena fejn barmil żejt l-ewwel laħaq prezz rekord ta’ $147, imbagħad f’temp ta’ tliet xhur il-prezz irreġistra l-akbar waqgħa li qatt wieħed seta’ jimmaġina.

Lura Malta, l-2008 tibqa’ mfakkra bħala s-sena ta’ tariffi ġodda tat-twerwir għall-konsum tad-dawl u l-ilma. Tariffi li qajmu kwistjonijiet kbar. Inkwiet li ċert li se nġorruh magħna fl-2009. U kwistjonijiet li għall-ewwel wasslu lill-unjins kollha jingħaqdu fi front wieħed b’tama qawwija li fl-aħħar konna se naslu għat-twaqqif ta’ Kunsill Trejdunjonistiku, imma mbagħad rajna għal darb’oħra l-partiġġjaniżmu politiku jirbaħ fuq l-interessi tal-ħaddiema.

Kienet ukoll l-2008 is-sena fejn partit politiku ewlieni mit-tnejn li għandna, ikkonferma, kif kien mistenni, il-Kap tiegħu, iżda bidel is-Segretarju Ġenerali, filwaqt li l-partit ewlieni l-ieħor, ironikament, bidel il-Mexxej iżda kkonferma lis-Segretarju Ġenerali. Għal xi wħud waħda mill-ftit affarijiet notevoli li l-partiti għamlu differenti wieħed mill-ieħor.

Fl-2008 rajna ukoll ħafna uċuh stabbiliti fil-Kabinett tal-Ministri Nazzjonalista jitilfu posthom, fl-istess ħin li rritorna John Dalli u fl-istess ħin li l-aktar aspirant għall-kabinett il-ġdid, Jeffrey Pullicino Orladno, kellu jitħalla barra natu¬ralment minħabba l-involviment tiegħu fl-akbar skandlu politiku tas-sena.

Fl-aħħar, l-2008 kienet is-sena li fiha ħalliena l-ewwel President tar-Repubblika Maltija, Sir Anthony Mamo, waqt li se tkun l-aħħar sena sħiħa f’kariga pubblika għall-President attwali meta nafu li fl-ewwel kwart tas-sena l-ġdida jiskadielu żmienu u jinħatar ieħor ġdid.

Nawgurawlu snin twal ta’ mistrieħ.

Liċenzji Anti-Soċjali

2008-12-27T13:09:00.012+01:00

Jekk it-tariffi l-ġodda tad-dawl u l-ilma huma xokkanti, il-ħlas il-ġdid li se jkollna nħallsu għal-liċenzji tal-karozzi u l-mod kif se jibdew jinħadmu, mhux biss fl-opinjoni tiegħi huwa xokkanti, iżda huwa inġust, anti soċjali u klassista. Hija ħasra li minħabba li l-attenzjoni ta’ kulħadd hi fuq id-dawl u l-ilma, il-liċenzji tal-karozzi ftit huma dawk li qegħdin jikkummentaw fuqhom.

Huma liċenzji li l-Gvern qed jiġġustifikahom taparsi bl-iskuża tal-ambjent meta l-iskop aħħari hu ċar li hu maħsub biex idaħħal kemxa tajba minn fuq min l-inqas jiflaħ, fl-istess ħin li jagħti vantaġġ lil min jiflaħ.

Il-ħlas il-ġdid fuq il-liċenzji se jkun ibbażat, fost l-oħrajn, fuq l-ammont ta’ snin li jkollha karozza, liema sistema qiegħda tikklassifika karozza ta’ sitta/seba’ snin bħala waħda diġà antika. Sistema li tikkastiga lil dawk li ma jifilħux jibdlu l-karozza sikwit u li konsegwenza t’hekk joqogħdu attenti ħafna li jibżgħu għaliha ħalli sservihom.

U min huma dawn in-nies? Huma ħaddiema tal-klassi tan-nofs u t’isfel. Ħaddieħor, min jista’, dawn il-liċenzji extra¬vaganti se jevita¬hom, għax komdu jagħmel hekk, billi jibdel il-karozza kull ftit snin. U min huma dawn in-nies? M’hemmx għaliex ngħidu, huma dawk li apparti li l-qagħda finanzjarja tagħhom tippermettilhom jibdlu l-karozza, ħafna minnhom il-kapital biex jixtru karozza ġdida u l-ħlasijiet tal-liċenzji mhux talli ma jħossuhx talli għall-fini ta’ taxxa jiddikjarawh spejjeż fuq il-kumpanija tagħhom… u allura jieħduhom lura.

U huwa proprju għalhekk li dawn il-liċenzji huma inġus¬ti, anti-soċjali u klassisti. Donnu l-messaġġ ewlieni hu: “M’hemmx x’tagħmlu! Ħallu t-toroq liberi għal min jiflaħ. Min ma jiflaħx dejjem jista’ jinqeda bit-trasport pubbliku!”

Min-naħa l-oħra hemm ukoll l-impatt li dawn it-tariffi l-ġodda se jħallu fuq is-suq tal-karozzi ‘second-hand’. Fil-fatt jidher li dawk li jinnegozjaw f’dan is-suq, l-aktar dawk li jimpurtaw mill-Ġappun, sabu ruħhom mil-lum għal għada, f’sitwazzjoni ta’ inċertezza kbira. U r-ritratti li qed nippubblika ma’ dan l-artiklu huma xhieda biżżejjed tal-inċertezza li nħolqot bit-tħabbir tal-liċenzji l-ġodda. Kulħadd jara kif jagħmel biex jilqa’ għad-daqqa li ġiet fuqu. Kulħadd joħroġ b’inizjattivi li ma kinux joħorġu bihom li kieku mhux qegħdin jaraw il-gwaj.

Istħi jekk taf

2008-12-27T13:05:00.003+01:00

Skandalizzajt ruħi meta fil-bidu ta’ dan ix-xahar qrajt li wara li pazjent tfajjel rebaħ kawża kontra l-gvern biex jiġi kkumpensat ta’ l-ispejjeż li għamel wara li kien kostrett ifittex trattament barra minn Malta, il-gvern Malti ddeċieda li jappella mis-sentenza. Fis-sentenza oriġinali tagħha l-Qorti iddikjarat li r-rifjut ta’ l-awtoritajiet tas-saħħa Maltin biex jagħtu trattament mediku bla ħlas lil dan it-tfajjel kien jikkostitwixxi ksur tal-obbligi li pajjiżna daħal għalihom bħala membru ta’ l-Unjoni Ewropeja.

Skandalizzajt ruħi aktar meta naf li l-gvern ma ddejjaq xejn iħallas eluf kbar, jekk mhux miljuni ta’ ewro, lil żewġ periti għal xogħol ripetut li għamlu fuq pjanti għal bieb il-belt, liema proġett baqa’ fuq l-ixkaffa u issa se jerġgħu jintefqu l-miljuni mill-ġdid. Skandalizzajt ruħi għaliex il-gvern ma min jidhirlu ma jappellax minn sentenzi li jkunu nqatgħu kontrih għal kumpens. Skandalizzajt ruħi għaliex ħafna drabi l-gvern, minn jeddu, kien ġeneruż f’kumpens li ddeċieda hu mingħajr intervent tal-Qorti lil individwi li allegaw li kienu vittmi politiċi. Ewlieni fosthom RCC li ġie kumpensat għall-attentat li seħħ fuq ħajtu fl-Mdina. Veru gvern ma jafx jistħi.

Il-PN partit priveliġġjat tal-UĦM

2008-12-17T12:17:00.009+01:00

Hija tassew ħasra li l-għamad politiku tal-mexxejja tal-UĦM u s-ĊMTU wassalħom biex jiżganċjaw ruħhom mill-kumplament ta’ l-unjins l-oħra u tbiegħdet kull possibilta’ li sseħħ l-għaqda bejn il-movimenti trejdunjonistiċi Maltin kollħa fi ħdan Trade Union Council. Ħasra, u ħtija li ma tinħafirx, li l-pass storiku li seħħ ix-xahar l-ieħor bil-manifestazzjoni konġunta li organizzaw l-unjins Maltin kellhu jispiċċa imminat b’dan il-mod ħtija ta’ min f’għajnejn ħafna qiegħed ipoġġi l-interessi tal-partit ta’ qalbu qabel l-interessi tal-ħaddiema li jirrappreżenta.

Ma nafx għalxiex dakinhar tal-manifestazzjoni organizzata mill-unjins bħal ħassejt xi ħaga ġewwa fija tgħidli li Gejtu Vella u William Portelli xejn ma kienu komdi. Bħal donnu l-body language tagħhom kixifhom. Mhux talli dehru skomdi ħafna talli l-kompartament tagħhom bħal ried jgħid li hemm ma kienx posthom. Dehru ħuta barra mill-ilma. Ta’ l-anqas dakinhar hekk rajthom jien. U b’dak kollu li ġara minn dakinhar ‘l hawn donnu ġie konfermat dak li ħassejt. Ħasra, nerga ngħid, li l-għamad politiku ta’ dawn huwa akbar mil-lealta’ tagħhom lejn il-ħaddiema, u akbar mil-lealta’ lejn il-pajjiż wara kollox. Qed ngħid dan għaliex bil-ħolqien ta’ TUC kien se jkun il-ħaddiem u l-pajjiz l-aktar li jibbenefikaw.

Intant, dan l-aħħar kont qed nitkellem ma kollega tiegħi tax-xogħol membru tal-UĦM. Dan stqarr miegħi bla tlaqliq li jinsab skandalizzat għall-aħħar bl-atitudni tal-UĦM u s-CMTU Qalli li għaxar snin ilu, u hu kien qabel magħha, il-UĦM kienet ordnat azzjonijiet industrijali propju minħabba l-istess kwistjoni li nqalgħet illum – it-tariffi tad-dawl u l-ilma. L-uniku żewġ differenzi bejn għaxar snin ilu u llum, qalli, huma l-ewwel li għaxar snin ilu kien Gvern Laburista li ried jintroduċi rati ġodda aktar għolja għad-dawl u l-ilma mentri llum il-Gvern hu wieħed Nazzjonalista, u t-tieni differenza hi li r-rati li qegħdin jipproponu llum Lawrence Gonzi u Austin Gatt huma, u se nuża kliemu ezatt, “bil-bosta aktar oxxeni minn dawk ta’ għaxar snin ilu.”

Dan sieħbi fakkarni wkoll li għal aktar minn gimgħa sħiħa, għaxar snin ilu, il-UĦM kienet kważi pparalizzat pajjiż meta litteralment waqfet kull importazzjoni u esportazzjoni, lejn il-pajjiż u mill-pajjiż, billi imblukkat il-gates tal-Freeport b’numru ta’ containers f’dik li kienet giet diskritta bħala azzjoni industrijali leġittima u legali. Kompla jgħidli li hu, bħala membru tal-UĦM, din id-darba ma kien qed jistenna xejn mill-unjin tiegħu anqas minn dak li għamlet għaxar snin ilu. Qalli li hu Nazzjonalist, għalkemm mhux xi wieħed appassjonat iżżejed, pero f’din il-ħaġa ma tidħolx politika. Jekk għaxar snin ilu, kompla jgħidli, dawk ir-rati kienu piż għal ħafna nies, Nazzjonalisti u Laburisti, dawn tal-lum huma piz ukoll, anzi aktar. Kompla jispjegali li l-fatt li ma kienitx pronta biex tieħu azzjoni industrijali kif għamlet għaxar snin ilu, il-UĦM iddiżappuntatu u nislet fiħ rabja enormi. “Agħar minn hekk,” żied jiftaħ qalbu “hu l-fatt li l-unjin tiegħi minn wara dahar l-unjins l-oħra,marret taqbel mal-gvern fuq rati li l-ebda unjin oħra, u l-ebda korp kostitwit ieħor, ma qabel.”

Qgħadt ukoll nisimgħu jargumenta kif fil-pajjiżi Ewropej, f’dik li ħi enerġija domestika l-konsumatur qiegħed jesperjenza roħs fil-prezzijiet biex jirrifletti r-roħs enormi li kien hemm fil-prezz taż-żejt - minn Awwissu s’issa l-prezz taż-żejt waqa’ b’madwar $100-il barmil. F’Awwissu l-prezz ta’ barmil zejt kien jiżboq il-$140 u llum kemm kemm jaqbeż l-$40. Fl-Italja hemm kompetizzjoni ħarxa bejn il-kumpaniji ta’ l-energija min minnhom joffri l-aktar kundizzjonijiet favorevoli lill-konsumatur. U hawn Malta l-kontijiet aktar minn ser jirduppjaw. Qalli wkoll li fejn għandu x’jaqsam fuwil għat-trasport il-petrol u d-dijżil fl-Ewropa raw roħs konsiderevoli. Hawn Malta l-Gvern mhux talli ma raħsux talli għollieh. Bħal dak li qallu aħna m’aħniex fl-Ewropa wkoll. U jiġu is-CMTU u l-UĦM u jaqblu mal-Gvern fuq dan kollu. Tal-mistħija u l-veru għarukaża!

Qagħad jispjegali wkoll li apparti r-roħs fil-units ta’ l-energija u r-roħs fil-fuwil, fl-Ewropa l-gvernijiet kollha minħabba l-krizi finanzjarja dinjija qed jadottaw strateġija fiskali stimulanti li biha jitfgħu aktar flus fi bwiet in-nies. Dan billi jnaqqsu l-piz tat-taxxi, iżidu l-benefiċċji, u jbaxxu r-rati ta’ l-interessi ħalli n-nies ikollha aktar flus fil-but x’tonfoq. Dan kollu bil-ħsieb li terġa tidħol il-kunfidenza u n-nies titħajjar tgħin ruħha u terġa tibda ddawwar l-ekonomija. Hawn, imbierka s-sapjenza ta’ min jemmen li kollox hu possibli, f’dan il-pajjiż fejn m’għandna riżorsi ta’ xejn, Alla jbierek l-affarijiet isiru bil-maqlub. Hawn inżidu t-tariffi tad-dawl u l-ilma, ngħollu l-fuwil, ngħollu t-taxxi, indaħlu oħrajn ġodda bħal tad-drenaġġ, tal-bozoz konvexxenti u tal-basktijiet tal-plastik, ngħollu l-liċenzji, u r-rati ta’ l-imgħax ma mmissuhomx, biex… qisna la nagħmlu parti mill-Ewropa u lanqas mill-kumplament tad-dinja. U s-CMTU u l-UĦM imorru jiġru jifthemu mal-Gvern tal-partit ta qalbhom mingħjar ma jkollhom id-diċenza ilaqqgħu lill-membri tagħhom biex jiksbu mingħandhom il-kunsens li jagħmlu dan.

Tant hu dispjaċut u disgustat dan sieħbi, li wasal biex infurmani li kien sejjer jirriżenja minn membru tal-UĦM u li kien se jagħmel dan b’mod immedjat.

Skond hu, u din il-battuta sarkastika għogbitni immens, jekk il-GWU hija l-unjin privileġġjata tal-PL, bla dubju ta’ xejn li l-Partit Nazzjonalista ma jistax igerger li m’huwiex il-partit privileġġjat ta’ l-Union Ħaddiema Magħqudin. U għandu raġun. Tassew li l-PN huwa aktar minn privileġġjat mal-UĦM

Dan ir-rakkont kelli l-permess tal-persuna konċernata biex nirrakkontah.

Intant, biex nuri kemm il-UĦM, is-CMTU, u l-Gvern huma iżolati fuq din il-ħaġa nagħlaq dan l-artiklu billi nikkwota x’kiteb l-opinjonista Dr Austin Sammut, li żgur ma jieħux għalih jekk ngħid li l-PN hu l-partit privileġġjat tiegħu, fuq it-Times tat-18 ta’ Novembru. “Probabbilment, l-agħar ħaġa wara l-gwerer hija d-dipressjoni ekonomika. Kif għandek tilqgħalha d-dipressjoni? Billi tistimula l-ekonomija. Kif tistimulaha l-ekonomija? Billi tħalli aktar flus fi bwiet in-nies. Dan ifisser aktar flus fiċ-ċirkulazzjoni u l-kunfidenza tal-konsumatur tiżdied u l-kummerċ jikber. Ma jiswiex li wieħed joqgħod jilgħabha ta’ l-eroj, kif qed jagħmel il-gvern, billi jibbilanċja l-bagit a spejjeż ta’ l-istimolu ekonomiku. Il-gvern għandu jieqaf jilgħabha ta’ l-eroj u jekk hemm bżonn għalissa jħalli d-defiċit jikber”

Qal, Dr Sammut, li n-nies mhux biss hija imbeżża’ imma mwerwra. Imwerwra mill-kontijiet tad-dawl u l-ilma. Imwerwra li mhix se tkun kapaċi tħallas il-kontijiet. Imwerwra minn dak li se jiġri mill-kwalita’ tal-ħajja tagħhom. Imwerwra għax ma jafux hux se jaqgħu taħt il-linja ta’ poverta’. Ma jafux kemm għadhom jistgħu jixtru rigali tal-Milied. Ma jafux x’se jiġri mix-xogħol tagħhom jew min-negozju tagħhom. Ħadd ma jaf x’se jiġri. Hawn inċertezza u instabbilta kbira. Li jwaslu għal biza’, liema biza’ se tiffriża l-konsum u n-negozju. Dan mhux jien qed ngħidu. Kitbu Dr Austin Sammut. F’artiklu li fiħ sejjaħ lil Austin Gatt “aggressive” jiġifieri goff, lill-Prim Ministru Gonzi laqqmu “lost Lawrence” jiġifieri mitluf u ma jafx fejn qiegħed, u lill-Ministru Tonio Fenech għoġbu jiddiskriviħ bħala “timid”, li hi kelma oħra għal najxu.

Bilħaqq, Dr Sammut spiċċa l-artiklu tiegħu billi stqarr li dan hu l-aktar mument opportun fl-istorja ta’ pajjiżna biex jitwaqqaf Kunsill Nazzjonali tat-Trejdunjins. Opportunita’, skond hu, li m’għandhiex tintilef. U l-UĦM u s-CMTU raw kif għamlu u tellfuha.

Tobgħod, u turi!

2008-12-06T15:49:00.006+01:00

Fl-aħħar artiklu tiegħi ktibt artikolett biex nuri solidarjeta` ma sieħbi Wenzu Mintoff wara li nies qrib tiegħu sfaw fil-mira tal-kitba imdardra ta’ Daphne Caruana Galizia. Kitba li kienet maħsuba unikament biex tferi s-sentimenti ta’ Wenzu Mintoff, liema kitba jien irriferejt għaliha bħala moqżieża daqskemm hu moqżież min kitibha. Għaliex ktibt hekk? Għaliex kont daqstant iebes? U għaliex, kif wegħedt fl-aħħar artiklu, se nerġa noqgħod niftħilha illum? Għaliex ma ninjorahiex kif kien hemm min qalli nagħmel? It-tweġiba hi sempliċi ħafna…u ngħidha bla ebda tingiż ta’ kuxjenza… din il-mara taf tobgħod u turi li taf tobgħod, u għal dan ma jistħoqqilha xejn għajr stmerrija bla qies. Jekk wieħed jinjoraha, ara wieħed jaħseb li se tħallih bi kwietu. Anzi kull ma jkun qed jagħmel hu biss li juriha li qed jibża' minnha u aktar jagħtiha forza biex tivvomta u tirremetti.

Għaliha, din il-mara, dawk li ma taqbilx magħhom huma lkoll irmixk, stupidi, ħamalli u injoranti. Is-socjeta`, skond hi, tkun perfetta biss jekk tkun magħmula minn ċorma nies tal-qatgħa tagħha. Il-verita` hi li dawk li ma taqbilx magħhom għandha raġuni għaliex ma taqbilx magħhom. Raġuni mli qatt ma tgħidha, imma li hi ċara aktar milli hu ċar il-kristall. L-interessi tagħha u ta’ dawk adwarha jiddependu fuq iċ-ċirku eżistenti tal-poter. U allura hu fl-interess tagħha li tiddefendi dejjem lil daċ-ċirku ta’ poter. Xi ħaga li għandha dritt tagħmel, u li ma tkun qed tagħmel l-ebda sagrileġġ jekk tibqa’ tagħmlu. Li hu sagrileġġ huwa l-fatt li fil-ħerqa biex tiddefendi l-interessi vestiti tagħha, tuża l-poter li tagħiha l-espożizzjoni fil-midja biex ixxerred l-odju u l-mibgħeda kontra min ma taqbilx miegħu. Agħar minn hekk, tidħollok f’razztek, fil-personal u jekk issib xi ħa, jew jidrilha li sabet xi ħaga, l-hena tagħha żżebilħek, tweġġek, tirredikolak, tumiljak u tiddieħak bik.

Jekk ma ssiblek xejn, u probabli wara din tal-lum jien se naqa’ f’din il-kategorija, l-hena tagħha ddaħħal subgħajha f’ħalqha u tirremetti fuqek dak kollu li jitla’ mill-istonku vomtuż tagħha. Biex tintimidak. Biex mingħaliha twerwrek. U twaqqfek milli tkompli, kif għandek kull dritt tagħmel, tifimha differenti minnha u tesprimi ruħek dwar dan fil-pubbliku. Tagħmel dan billi tpinġik l-iskart tas-soċjeta’. Taqla’ fuqek il-ħniżrijiet. Ixxerred l-odju u l-mibgħeda fil-konfront tiegħek. Jekk ma ssibx xi tgħid fuqek, jew fuq qrib tiegħek, tfittex id-difetti fiżiċi u tgħajjar lil dak li jkun bid-dehra u l-fiżika tiegħu.

U issa, imbierka s-sapjenza ma nafx ta’ min, qiegħda tieħu l-inkarigu tidħol fir-relazzjonijiet extra matrimonjali, li jekk ikunux eżistew jew le Alla biss jaf, ta’ nies li m’humiex fil-ħajja pubblika u li l-unika raġuni li tagħmilhom fil-mira tagħha hija li tali persuni jistgħu ikunu qrib ta’ persuna pubblika. Tal-mistħija! Ħmieġ! Żibel!

Lill-Mexxej Laburista attwali għajritu parti ġenitali ta’ mara. U kitbitha bil-Malti pur, jekk jogħġbok. Ara x’ħamallaġni! Qaltlu wkoll, biex mingħaliha tirredikolah, li bies is-salib, fil-ġurament tal-ħatra tiegħu bħala Kap ta’ l-Oppożizzjoni, bħalma jitbewwsu n-namrati.

Lil Toni Abela qaltlu li jekk tidħol f’kamra u ssibu bil-wieqfa fuq siġġu b’ingassa m’għonqu qed jaħsibha jitgħallaqx jew le, ikun il-gost u l-pjaċir tagħha tneħħilu s-siġġu minn taħt saqajh. Ara xi ħdura.

Lill-Kap ta’ l-Oppożizzjoni preċedenti kienet daħlitlu fil-ħajja matrimonjali tiegħu u bdiet taqla’ kull ħaġa biex toskurah. Saħansitra kienet ġabet l-istmerrija ta’ l-ex mara tiegħu. Kienet anki kontinwament tinbxu bid-dehra u l-fiżika tiegħu lanqas li kienet xi waħda perfetta. Vera ma tistħix il-mara.

U issa ma’ Wenzu Mintoff qabżet kull limitu, jekk il-mibgħeda tagħha għandha limitu wara kollox, billi ppruvat tweġġgħalu s-sentimenti tiegħu billi ddaħħal imneħirha t-twil li għandha, ħa naqa’ waħda fil-fiżiku jien ukoll kif taqa’ hi, fil-ħajja privata mhux ta’ Wenzu imma ta’ persuni qrib Wenzu, mingħajr ma taf jekk dak li allegat, jew li ppruvat tallega, hux minnu, u meta wħud mill-persuni li ppruvat tagħmel referenza għalihom ma jistgħux jiddefendu ruħhom għax m’għadhomx magħna. Ħdura? Tridx tmur! Dan issejjaħlu ġurnaliżmu? X’taqbad issejħilha kitba bħal din? Ksuħat? Qżież? Bżieq? Jew assenza tal-ħdura?

Jekk din is-sinjura trid tkompli titqalla’ billi tagħtina aktar tagħrif dwar min raqad ma’ min, u dwar meta dak mar ma’ dik u ma’ l-ohra, allura nistedinha tagħmel kuntatt miegħi u niddireġiha ‘l fejn għandha titfa’ ħarsitha. U jekk jinteressaha persuni li marru ma’ persuni oħra ta’ l-istess sess, jew oħrajn ma’ minorenni, ngħidhomlha wkoll.

Sadanittant, minkejja kull rabja li għandi, inħossni fid-dmir li minn din il-kolonna nagħmel ftit appelli.

1. L-ewwel appell lil dak l-editur ta’ dak il-ġurnal li qed jagħtiha pjattaforma, kemm fuq il-ġurnal tiegħu u kemm fuq il-blog, biex jirrifletti ftit xi ħsara qiegħda ssir. Nappellalu jkun diskret x’jiġi ppubblikat, imma aktar minn hekk jieqaf jagħti pjattaforma lil min bil-pinna tiegħu qed jagħmel tant ħsara. La ma tafx tikkontrolla l-odju tagħha din il-persuna m’għandhiex titħalla tikteb.

2. It-tieni appell lill-qarrejja kollha ta’ dan il-ġurnal. Jekk intom bħali tqallajtu taqraw lil din l-opinjonista, agħmlu bħali. Uru l-protesta tagħkom billi tieqfu għal perjodu tixtru dan il-ġurnal ħalli d-diriġenza tiegħu tinduna li hemm xi ħaġa ħażina.

3. It-tielet appell imur għall-Istitut tal-Ġurnalisti. Nappellalkom tieħdu pożizzjoni iebsa għaliex kitba ripetuta ta’ dan it-tip qiegħda titfa dell ikrah fuq il-professjoni tagħkom.

4. Ir-raba’ appell nindirizzah lil dawk kollha li jirriklamaw fil-ġurnali. Nappellalkom biex tkunu selettivi fl-għażla ta’ fejn tirriklamaw. Ma jixraq lill-ebda ditta serja li tforni flusha lil min juża għodda tant b’saħħitha biex ixerred il-mibgħeda.

5. L-aħħar appell inwasslu lill-Qrati tagħna. L-ewwelnett ma jistax jitqies li tkun saret ġustizzja meta każi bħal dawn jieħdu għexieren ta’ snin biex jinqatgħu. Il-malafama hija vjolenza morali li aktar ma jgħaddi żmien minn fuqha akbar ikun l-effett. Hemm bżonn aktar prontezza. U hemm bżonn li l-kundanna tkun tirrifletti l-ħsara li saret.

Għal-lum nieqaf hawn…fl-istess ħin li inħejji ruħi għal ftit żeblieh.

Sharon

2008-11-25T21:32:00.000+01:00

Sitta, ħames snin ilu l-issue fuq l-aġenda nazzjonali kienet l-UE Dibattitu nazzjonali sħiħ ta’ sentejn jew aktar, li ġie riżolt b-elezzjoni fl-2003. Fuq naħa tad-dibattitu kellek dawk li imbuttaw għal sħubija u fuq in-naħa l-oħra dawk li xtaqu tip ta’ relazzjoni oħra. Fil-fatt huwa għalhekk li kienet issue, għax kellek diverġenza ta’ ħsieb. Kieku kulħadd kien fehma waħda, kieku ma kinietx tkun issue. F’demokrazija l-issues huma l-istimulu għall-ħsieb u d-diskussjoni, li finalment iwaslu lil-poplu biex jiddeċiedi.

Pero` kull min ikkontribwixxa għal dik id-diskussjoni għalija kien strumentali biex il-proċess demokratiku jaħdem kif għandu jaħdem, u kien strumentali biex il-poplu seta' jasal għal deċizjoni. Hekk taħdem id-demokrazija. U l-mertu tad-deċizjoni għandu jmur għal kull min ikkontribwixxa għal dik id-diskussjoni. Ara llum, l-UE m’għadhiex issue. Għaliex ġiet riżolta u għax ġiet aċċettata minn kulħadd.

Diskussjoni llum fuq il-linji ta’ ħames snin ilu fl-opinjoni tiegħi issarraf f’aktar ħsara milli ġid, imma diskussjoni dwar kif kulħadd jista, u għandu, jikkontribwixxi biex id-deċizjoni li ħadna insarfuha f’ġid għal pajjiżna, hija meħtiega. Jekk ħames snin ilu naħa rebħet fuq l-argumenti tan-naħa l-oħra m’għandux ifisser li kull min kien fuq in-naħa telliefa għandu jippakkja u jitlaq mill-pajjiż.

Qed ngħid dan għaliex ħafna fil-PN donnhom li hekk jippretendu. Għalihom Joseph Muscat m’għandux jiftaħ ħalqu fuq l-UE għaliex dak iż-żmien kellu argumenti differenti minn tagħhom. Taqra l-midja tal-PN tarahom jissuġġerixxu li Sharon Ellul Bonnici m’għandhiex tkun aċċettata bħala kandidata Laburista għall-Parlament Ewropew għaliex fi żmien tad-diskussjoni nazzjonali dwar l-UE kienet tikkampanja, billi tagħti informazzjoni, għal triq differenti minn sħubija. Bl-istess argument allura l-MLP jista ma joħrog lil ħadd għax dak iż-żmien kulħadd fl-MLP kellu argumenti differenti.

Ġejt imnebbah nikteb dan għaliex ma flaħtx nara dawn l-attakki fuq Sharon. Sharon hija mara versatili, inteliġenti, taf b’għajnejha magħluqa kif taħdem l-UE u fl-opinjoni tiegħi tkun kandidata ideali ħafna. Ili nafha bosta snin. Konna kandidati t-tnejn fl-elezzjoni ta’ l-2003 u l-mara, anki jekk għaddewwa mill-infern tad-dinja, tippossiedi determinazzjoni li ma tagħti qatt ruħha b’mirbuħa.

Wenzu

2008-11-25T21:30:00.002+01:00

Ma' sieħbi Wenzu Mintoff irrid pubblikament nuri sens ta’ kompassjoni u solidarjeta` wara li membri tal-familja tiegħu sfaw fil-mira tal-kitba imdardra ta’ Daphne Caruana Galizia. Kieku Wenzu safa fil-mira minħabba xi ħaga li seta’ għamel hu, sakemm din tkun relatata ma’ l-attivita` pubblika tiegħu, hija aċċettabbli. Imma li jisfa fil-mira minħabba allegat affarijiet purament privati li seta' għamel ħaddieħor, u li din ir-riferenza ssir unikament biex tferilu s-sentimenti tiegħu, huwa moqżież u inaċċettabbli. U aktar milli hu moqżież il-feriment innifsu hija moqżieża l-awtriċi ta’ dik il-kitba. Għal-lum nieqaf hawn u inkompli darba oħra. Pero` jiżbalja dak l-editur ta’ dik il-gazzetta li qed jagħti pjattaforma lil din il-mara mimlija odju jekk jaħseb li hu m’għandux ukoll toqla xi jġorr fuq il-kuxjenza tiegħu. Dik il-gazzetta jien daqshekk xtrajtha…u darba oħra niftaħha aktar.

Louis

2008-11-25T21:26:00.001+01:00

Bħala Maltin għandna għalfejn inkunu kburin li Malti bħalna, l-Ewroparlamentari Louis Grech, kien il-protagonista biex inbotta ‘l quddiem fil-Parlament Ewropew numru ta’ proposti importanti fil-ġlieda dwar it-tibdil fil-klima. Mhux biss ressaq numru ta’ proposti importanti, imma kontra kull previjoni, anki minn ċerti midja hawn Malta, irnexxielu jikkonvinċi u jinfluwenza l-maġġoranza ta’ sħabu l-ewroparlamentari, ġejjin minn liema kull naħa ta’ twemmin politiku, biex f’seduta plenarja jivvutaw favur il-proposti tiegħu.

Min għandu idea ta’ kif jaħdem il-Parlament Ewropew jaf li mhux biżżejjed fil-Parlament Ewropew li jkollok proposti validi biex iġġib l-appoġġ għalihom. Irid ikollok ukoll kuntatt tajjeb u kontinwu biex il-lobbying li jkun għaddej ma thallihx ixekklek, anzi jekk jista’ jkun tużah għall-vantaġġ ta l-ideat tiegħek. Biex tkun f’posizzjoni li tagħmel dan, naturalment, trid tkun persuna li tul il-ħidma tiegħek irnexxielek tiggwadanja rispett wiesgħa minn kulħadd. U seħibna, Malti bħalna, Louis Grech, irnexxielu jibni għalih, u għal pajjiżna ngħid jien, stima, rispett u fiduċja li ftit oħrajn jistgħu jgħidu li jgawdu daqsu. Tant hu hekk li minn parlament ta’ kważi 800 persuna kien hu, Malti bħalna, li intagħzel biex iħejji l-budget ta’ l-UE. Posizzjoni li qeda b’suċċess u b’mod l-aktar amminervoli.

Ħadt ir-ruħ meta dan l-aħħar sirt naf li, kuntrarju għal dak li xebgħu jgħidu fil-midja Nazzjonalista, Louis Grech se jerġa' jikkontesta l-elezzjoni ta’ Ġunju li ġej.

Barack

2008-11-25T21:11:00.004+01:00

Barack huwa isem Afrikan. Pronunzjat, maħtuf u miktub Barack sempliċiment biex jiffittja fil-pronunzjatura tal-lingwa Ingliża. L-isem Barack huwa isem imnissel mill-Għarbi. Li jfisser barka. Jiġifieri min jinagħta l-isem Barack ikun qed jissemma l-Imbierek, bil-Malti, jew Blessed, bl-Ingliż.

Barack Obama jista' jkun, u ħafna qed jistennewh li jkun, xiehda ta’ ismu billi jimbotta politika li ddaħħal lid-dinja f’era ta’ barka u sliem. Kontinwament fid-diskorsi tiegħu Obama esprima x-xewqa li l-politika tal-militariżmu tagħmel wisgħa għall-politika tal-paċi u l-ġustizzja. U nissel it-tama fost ħafna li d-dinja tista tkun kapacċ tassew issegwi din it-transizzjoni. Transizzjoni li hu jsejjħilha ‘Bidla’. ‘Bidla li nistgħu nemmnu fiha, u li nistgħu nwettquha.’

F’ħajti kienu bosta dawk li għamilthom eroj tiegħi. Ewlieni fosthom Nelson Mandela li ma nixba qatt naqra, u nerġa naqra, l-awtobijografija tiegħu Long Walk To Freedom. Eroj ieħor f’ħajti kien l-ex mexxej Laburista Ingliż Tony Blair li imbagħad iddeludieni meta ħalla lilu nnifsu jiġi influwenzat wisq mill-politika ta’ Bush. Barack Obama huwa l-eroj il-ġdid ta’ ħajti. Ili nsegwih sa mill-kampanja tiegħu ghal Senatur għal Illinois. Mill-bidu beda juri li hu materjal straordinarju, għalkemm nammetti qatt ma bsart li se jagħmilha daqstant malajr għall-Whitehouse.

Obama huwa kampjun tad-diversita`. Għandu l-abbilta’ li jibni koalizzjoni wiesgħa ta’ nies differenti, b’għeruq differenti. Jaf jikkomunika u juża l-komunikazzjoni biex jgħaqqad. B’hekk irnexxielu jipproġetta lilu nnifsu dak li fil-fatt hu – aġent tal-bidla. U mexxa kampanja organizzata u dixxiplinata marbuta l-ħin kollu mat-tema tal-bidla.

L-Istati Uniti ta’ l-Amerika, u l-poplu kollu Amerikan li wera tant maturita` f’din l-għażla diversa, huwa issa li tassew għandhom f’ħoġorhom opportunita` li juru li huma potenza fid-dinja. Mhux potenza li toħrog mis-saħħa militari li għandhom, imma potenza għaliex bl-elezzjoni ta’ Obama wettqu ħolma li d-dinja kollha riedet. Lil Obama rieditu d-dinja kollha u issa għandhom l-opportunita` li jibnu fuq l-aspettattiva li d-dinja bniet madwar din il-ħolma ġdida. Huwa issa li tassew għandhom l-opportunita` li juru t-triq. U fiduċjuż li Barack Obama se jkun għalija Nelson Mandela ieħor….u mhux deluzjoni kif kien Blair.

Elezzjoni Storika

2008-11-01T17:47:00.006+01:00

L-elezzjoni Presidenzjali fl-Istati Uniti ta’ l-Amerka ta’ nhar it-Tlieta li ġejjin hija meqjusa bħala waħda storika. Il-kobor ta’ l-interess pubbliku f’din l-elezzjoni, mhux biss fl-Amerka imma madwar id-dinja kollha, hu wieħed bla preċedent. U l-kampanja feroċi għaliha u l-flejjes li ntefqu fiha huma wkoll bla preċedent. Kienet kampanja intensa, bla waqfien għal kważi sentejn, fejn l-ewwel kellna l-elezzjonijiet primarji taż-żewġ partiti ewlenin imbagħad f’dawn l-aħħar xhur assistejna għall-aħħar sprint finali. Tant kien kbir l-interess li kien hemm numru rekord ta’ ċittadini Amerikani li rreġistraw ruħhom għall-vot għall-ewwel darba, L-akbar numru fosthom huma ċittadini ta’ ġilda skura li fis-snin imgħoddija kienu jabdikaw milli jivvutaw.

Erba’snin ilu fil-ġimgħa ta’ l-elezzjoni nzertajt barra l-pajjiż. Kont ingħalaqt ġurnata u nofs fil-kamra tal-lukanda nsegwi r-riżultati ħerġin stat stat u wara l-programmi ta’ analiżi u diskussjoni li jsegwu. B’koinċidenza l-ġimgħa d-dieħla wkoll se nerġa’ nkun imsiefer,u ninsab ippreparat biex it-Tlieta u l-Erbgħa ningħalaq klawsura biex ma nitlifx mument wieħed minn dan l-avveniment.

Il-ħatra ta’ l-aktar bniedem b’saħħtu fid-dinja, mħux biss għaliex ħija l-akbar ħatra ta’ poter fid-dinja politika imma wkoll għaliex din il-persuna se tkun il-ċommander in ċħief ta’ l-unika super-potenza militari li fadal, għandħa tinteressa lilna daqs kemm tinteressa lill-Amerikani. Bi preparazzjoni għal dan l-avveniment għalħekk iddeċidejt li llum nagħti ftit tagħrif, mill-aħħar tagħrif li ħiereġ, liema tagħrif wieħed għandu jsibu utli biex isegwi aħjar l-aħħar jumejn tlieta ta’ din il-kampanja.

Mill-figuri ta’ diversi stħarriġ ta’ l-opinjoni pubblika li qed jiġu ppubblikati, kemm dawk li qed isiru stat stat kif ukoll dawk li qed isiru fuq skala nazzjonali, wieħed għandu għalxiex jassumi li jekk f’dawn l-aħħar siegħat ma jiġri xejn staordinarju, bħal xi attakk terroristiku fuq l-Istati Uniti, Barack Obama mhux biss se jirbaħ din l-elezzjoni imma jista’ wkoll jirbaħ b’mod komdu u konvinċenti. U minkejja li l-aħħar stħarrig qed jindika li McCain naqqas id-distakk minn mar-rival tiegħu xorta waħda Obama għandu vantaġġ nazzjonali li jvarja bejn erba’ u sitt punti perċentwali.

Aktar minn hekk, il-miraklu li għandu bżonn McCain huwa aktar diffiċli li jseħħ meta nafu li l-elezzjoni fl-Istati Uniti ma tiġix deċiza b’vot popolari fuq skala nazzjonali. Fis-sistema Amerikana kull stat għandu abbinat miegħu numru ta’ voti fil-Kulleġġ ta’ l-Eletturi. Issir elezzjoni f’kull stat. U r-rebbieħ ta’ kull stat jieħu l-voti kollha li jġorr dak l-istat fil-Kulleġġ ta’ l-Eletturi. Jidher li minn 52 stat, 42 huma deċizi diġa b’mod ċar lejn naħa jew oħra. Minn dawn l-istati Obama jidher li hu assigurat minn 235 vot fil-Kulleġġ ta’ l-Eletturi filwaqt li McCain għandu rasu mistrieħa biss minn 163 vot. L-għaxar stati l-oħra, għalkemm Obama jidher li għandu vantaġġ f’kull wieħed minnħom, id-distakk mhux daqstant ċar u allura għadhom meqjusin dubjużi. Biex kandidat jigi dikjarat rebbieħ għandu bżonn 270 vot fil-Kulleġġ ta’ l-eletturi. Jiġifieri Obama jonqsu 35 vot. Florida waħidha ġġorr 27 vot u Ohio 21 vot. Dawn huma tnejn mill-aktar stati fejn il-kandidati jinsabu viċin.

Bażikament, biex jikkanċellaw l-iżvantaġġ li għandhom u jirbħu l-elezzjoni McCain u r-Repubblikani għandhom bżonn jirkupraw 2% tal-voti fl-istat ta’ Florida, 2% oħra fl-istat ta’ North Carolina, 2% fl-istat ta’ Indiana, 2% fl-istat ta’ Missouri, 5% fl-istat ta’ Ohio, 5% fl-istat ta’ Nevada, u 8% fl-istat ta’ Virginia. Ilkoll stati dawn li kienu f’idejn ir-Repubblikani u li Obama qed jirnexxielu jxaqlibhom lejh. Barra minn hekk, għandu bżonn ukoll McCain iżomm vantaġġ ta’ 4% li għandu fl-istat Repubblikan ta’ Georgia, u jara kif jisraq lid-Demokratiċi wieħed mill-istati tagħhom ta’ Pennsylvania, Colorado, Iowa u New Mexico. Sinċerament ma nafx liema bakketta maġika tista’ twettaq din il-formula komplessa li għandhom bżonn ir-Repubblikani.

Biss biss, biex iġibu lura Virginia fil-kolonna Repubblikana għandhom bżonn jirkupraw żvantaġġ ta’ 8%, u biex jisirqu Pennsylvania mill-kolonna tad-Demokratiċi għandhom bżonn jirkupraw żvantaġġ ta’ 11%. U magħhom l-istati l-oħra kollha li semmejna. Altru milli miraklu. Barack Obama qiegħed biss tliet ijiem bogħod milli jikteb l-istorja billi jsir l-ewwel President b’ġilda skura fl-Istati Uniti.. U qiegħed b’seba’ għajnejn li ma jagħmilx żbalji għax jaf li l-elezzjoni jista jitlifha biss jekk juri ċerta kompjaċenza u kunfidenza żejda, jew jekk jagħmel xi żball oħxon. Din hi elezzjoni li qatt m’għandha tintilef. Ir-Repubblikani zmienhom għamluħ u n-nies hija għatxana għall-bidla.

L-exit polls fost dawk li għazlu li jivvutaw kmieni, għax fl-Amerka teżisti l-faċilita’ li wieħed jista jixħet il-vot tiegħu kmieni waqt il-kampanja, juru li Obama għandu l-appoġġ tal-maġġoranza fost dawk li għamlu użu minn din il-faċilita’.

Sadanittant stħarriġ ieħor jindika li għad fadal madwar 6% tan-nies li għadhom indeċizi x’se jivvutaw. Normalment wħud minn dawn jispiċċaw jivvutaw lil xi kandidat indipendenti. Ralph Nader, kandidat indipendenti kważi f’kull elezzjoni u li se jerġa’ jikkontesta, fis-sena 2000 kien ġab biżżejjed voti f’Ohio biex tellef dan l-istat lil Al Gore biex b’hekk President kien laħaq George W. Bush. Imma anki hawn Obama jidher li sab triq kif jidħol. Stħarriġ fost dawk li irreġistraw lilhom infushom bħala indipendenti juri li Nader naqqas il-popolarita’ a spejjeż ta’ Barack Obama.

Aspett ieħor li qiegħed jissemma ħafna f’din l-elezzjoni huwa l-fattur tal-Bradley effect. X’ikun dan il-Bradley effect? Huwa fenomenu li seħħ f’aktar minn okkażjoni waħda kull meta kandidat abjad kien kontestat għal xi elezzjoni minn kandidat ta’ kulur. Qatt ma ġara hekk f’elezzjoni presidenzjali għaliex din hi l-ewwel darba li kandidat abjad huwa kontestat minn wieħed ta’ kulur f’elezzjoni presidenzjali. Imma f’elezzjonijiet biex jinħatar governor ta’ xi stat kien fenomenu li feġġ f’ħafna okkażjonijiet. Nies ta’ ġilda bajda, meta jkunu avviċinati minn xi kumpanija ta’ l-istħarriġ tal-fehma pubblika, jiddikjaraw li se jivvutaw lill-persuna skura sempliċiment biex jidhru li huma persuni tolleranti, imma mbagħad meta jkunu weħidhom jivvutaw jagħmlu propju l-oppost. Ġrat l-ewwel darba fl-1982 meta kandidat ta’ ġilda skura bl-isem ta’ Tom Bradley ikkontesta kandidat abjad għal governor f’California u minkejja li deher li kellu vantaġġ komdu ħafna fil-konfront tal-kontestant l-ieħor spiċċa tilef l-elezzjoni bil-kbir. Minħabba f’hekk kull stħarrig f’din l-ewwel elezzjoni presidenzjali bejn abjad u iswed jista’ ma jkunx korrett daqs kemm kien korrett f’kull elezzjoni preċedenti. Madankollu analisti politiċi jargumentaw li dan il-fenomenu tul is-snin naqqas mill-forza tiegħu u l-aktar li jista’ jkollu effett huwa ta’ 2%. Li jistgħu ma jkunux biżżejjed għal McCain.

Intant, nippreparaw ruħna għal nhar it-Tlieta u naraw.

$71-il Barmil

2008-10-19T20:54:00.003+02:00

Fl-aħħar erba’ ħames xhur ma kienitx tgħaddi ġurnata waħda li ma konniex niġu mfakkra li l-isplużjoni ‘il fuq tal-prezz taż-żejt donnu ma jista jżommha ħadd. Tgħidx kemm stagħġibt meta l-prezz qorob lejn il-$100 dollaru-il barmil. Imbagħad $110 qalulna. Imbagħad qabeż il-$120. U kompla sejjer sakemm saħansitra tela’ sa $147. Kuljum jaġġornawna bil-prezz il-ġdid. U magħhom iżidulna l-aġġornamenti tal-prezz dejjem jogħla tal-petrol u d-diesel għall-konsumatur, kif ukoll it-tariffi aġġornati tas-surcharge fuq il-kontijiet tad-dawl u l-ilma.

F’dawn l-aħħar ħmistax-il ġurnata l-prezz taż-żejt beda jaqa kuljum. U issa barmil żejt qiegħed jinbiegħ għall-prezz ta’ $71. Jiġifieri waqa b’aktar min-nofs. Imma ħaġa ta’ l-iskantament l-aġġornamenti li kienu qed jagħtuna meta l-prezz kien qed jisplodi ‘l fuq issa xxuttaw. Bħal donnu li hi aħbar li l-prezz qed jogħla, imma mhix aħbar meta dan jibda jorħos.

Huwa aktar ta’ l-iskantament il-fatt li meta tara l-aħbarijiet fuq stazzjonijiet barranin ssib li l-prezz tal-petrol u d-diesel għall-konsumatur qiegħed jirrifletti r-roħs li hemm fis-suq, imbagħad f’Malta dan mhux talli mhux qed jiġri talli l-prezzijiet baqgħu għoljin daqs li kieku l-prezz taż-żejt għadu $147 il-barmil.

Naħseb li bħala konsumaturi jimmeritana spjegazzjoni. X’inhi r-raġuni li l-konsumatur Malti m’huwiex trattat bħal dak Ingliż, Taljan, Franċiż u Ġermaniż?

Ħaddiema Żejda

2008-10-19T20:46:00.004+02:00

Dan l-aħħar il-Ministru Austin Gatt qalilna li L-Enemalta għandha magħha ħafna ħaddiema żejda. Mhix xi ħaġa ġdida. Smajniha kemm-il darba. U f’diversi intrapriżi li kellu sehem jew għad għandu sehem fihom il-Gvern.

Li jiskantani hu kif kull politiku jiġi quddiemna bla mistħija ta’ xejn u jippretendi li jimpressjonana li qed jagħmel xogħlu għax sempliċiment jiddikjara li hemm in-nies żejda. Sa fejn naf jien ħadd ma jaqbad u jimpjega lilu nnifsu. L-ebda ħaddiem m’għandu l-poter li jdaħħal lilu nnifsu f’xi intrapriża hi liema hi. Xi ħadd dawn in-nies impjegahom hu. U wara 21 sena fil-Gvern il-PN żgur ma għadx fadallu l-iskuża li dawn impjegahom il-Gvern ta’ qablu. F’21 sena daħlu skoss nies oħra huma. U dan barra l-bambin biss jaf kemm mietu nies u oħrajn spiċċaw bl-eta’.

Jiġifieri, f’kelma waħda, huma l-politiċi l-aktar nies responsabbli għal sitwazzjonijiet bħal dawn. U probabli l-istejjer li nstemgħu ta’ ingaġġi ta’ nies bl-addoċċ fil-Freeport u fl-M.I.A. xi ftit verita’ fihom hemm ukoll. U tara xejn xi darba għad jitfaċċa xi Ministru ċdid jitkaża bin-nies żejda f’dawn l-ażjendi.

Ivvintat mill-Ġdid

2008-10-19T20:37:00.004+02:00

Meta kollox beda jindika li l-Prim Ministru Ingliż Gordon Brown u l-Gvern li jmexxi beda t-triq 'l isfel, u meta ma seta xejn jiġi tajjeb għal Brown tant li Cameron, il-Kap tal-Konservattivi Ingliżi, beda jidfnu fil-popolarita’, faqqet din il-kriżi finanzjarja u Gordon Brown ivvinta mill-ġdid lilu nnifsu. Hekk hi l-politika. Ġimgħa tista tkun tfisser ħafna. Ġimgħa taf tibdel kollox.

Fil-fatt Gordon Brown, mgħejjun mill-fatt li kien wieħed mill-aħjar Chancellor of the Exchequer li qatt kellu r-Renju Unit, kif faqqet din il-kriżi bankarja dinjija ħa f’idejh ir-rwol ta’ mexxej ewlieni u nistgħu ngħidu li qed jispikka fuq il-mexxejja kollha ta’ l-Ewropa u lil hinn minnha. Mix-xejn trasforma ruħu bħala World Leader. U kriżi bħal din spiċċa dawwarha favurih. Min ħaseb li Brown kien midfun u lest mar imqarraq u f’mument fejn il-kriżi tidher li mhux se tkun waħda qasira kollox jindika li dan il-mument popolari għalih personli se jitwal. Ħafna ċittadini tar-Renju Unit qed jaraw fih il-bniedem perfett fil-mument li għaddejja minnu d-dinja. Dan meta sa ftit tal-ġimgħat ilu l-pożizzjoni tiegħu kemm bħala Prim Ministru kif ukoll bħala mexxej tal-Partit Laburista Ingliż kienet meqjusa kif jgħidu l-Ingliżi in the balance.

Sadanittant nidħak nara l-aħbarijiet f’Malta u nisma lill-Prim Ministru tagħna jgħid li pajjiżna huwa l-uniku pajjiż li ma ġiex affettwat b’din il-kriżi. Jgħid li l-affarijiet f’pajjiżna huma tajbin. U jgħid ukoll li dan grazzi għall-fatt li llum aħna membri ta’ l-U.E. u ż-żona ewro. Grazzi wkoll jgħid għas-sistemi tajbin li għandna u l-politika ġusta li biha jimxi l-Gvern tiegħu. Jgħid li kieku ma kienx hekk kien jiġrilna bħall-Islanda. Issa sa fejn naf jien Franza, l-Italja, il-Belġju, u l-Ġermanja, fost oħrajn, huma wkoll membri ta’ l-U.E. u jinsabu fiż-żona ewro… u intlaqtu waħda sew. Imma li jbellahni f’dan kollu hu li la darba aħna daqshekk tajbin, u la darba bħalna m’hawnx, kif il-mexxejja tad-dinja ma bagħtux għalina ħalli nsolvu l-problemi kollha tad-dinja? Jaħasra għadhom ma jafux bina!!

Biden VS Palin

2008-10-09T21:35:00.004+02:00

- Artiklu miktub fl-01 ta' Ottubru 2008 -

Bdejt nikteb dan l-artiklu l-bieraħ fl-4.30 ta’ filgħodu appena spiċċa l-uniku dibattitu televiżiv bejn iż-żewġ sfidanti għall-kariga ta’ Viċi President ta’ l-Istati Uniti, Joe Biden u Sarah Palin. Bħalissa bis-sehem ta’ numru ta’ anilisti politiċi Amerikani se jibda programm li janalizza il-wirjiet tat-tnejn fl-imsemmi dibattitu. Nixtieq insegwih, imma jekk nagħmel dan l-Editur jibqa' mingħajr il-kolonna tiegħi.

Bla dubju ta’ xejn dan kien l-aktar dibattitu bejn il-kontendenti għal Viċi President li qatt qajjem interess pubbliku. L-istennija għalih kienet waħda tremenda. Kien pronostikat li dan id-dibattitu kellu jattira miljuni ta’ telespettaturi Amerikani, probabbilment jeċċedu fin-numru anki dawk li segwew l-ewwel dibattitu bejn Obama u McCain. Naturalment magħhom trid iżżid miljuni oħra minn madwar il-globu. Fl-opinjoni tiegħi ż-żewġ kontendenti irreaġixxew b’mod mill-aktar onorabbli għal din l-aspettattiva għaliex irregalawlna dibattitu mill-aqwa. Ngħid għalija ma jiddispjaċini xejn li kelli mbakkar daqshekk kmieni.

Intant, kieku kellu jaqa’ fuqi l-kompitu li niddikjara r-rebbieħ ta’ dan id-dibattitu, minkejja li Biden mar xi ftit aħjar, insibha ftit diffiċli biex nasal biex niddikjara lil Palin telliefa. Pero ma nsibha xejn diffiċli biex nidentifika l-akbar tellief. Anzi mhux tellief, imma telliefa. Fl-opinjoni l-akbar telliefa minn dan id-dibattitu kienu John McCain u l-Partit Repubblikan

Sarah Palin daħlet għal dan id-dibattitu tbati minn perċezzjoni pubblika xettika dwar il-kapaċitajiet tagħha u dwar in-nuqqas ta’ esperjenza tagħha f’dan il-livell. Ħafna bdew ipinġuha li mhix ta’ materjal biżżejjed. Appellabbli kemm trid, imma inkapaċi.. Daħlet għal dan id-dibattitu b’kompitu diffiċli li tgħolli r-reputazzjoni tagħha. Il-prestazzjoni tagħha għenet mhux ftit il-kawża tagħha. F’dan ir-rigward rebħet. U mhux naqra. Mill-banda l-oħra pero, biex setgħet tagħmel dak li għamlet, issagrifikat il-missjoni primarja li wieħed jistenna f’dibattitu bħal dan mill-kontendent għal Viċi. Ċioe’ dik li jattakka lill-kandidat presidenzjali tal-partit oppost u jiddefendi lill-kandidat presidenzjali tal-partit tiegħu.

Minn naħa tiegħu Joe Biden, tattikament rebaħ dan id-dibattitu għaliex filwaqt li ma fixkel xejn lil Palin mill-missjoni personali tagħha, tant li ma attakkaha fl-ebda ħin, immartella lil McCain, lil Bush, u lil Cheney, b’abbilta’ kbira imma b’manjiera mill-aktar prudenti, mirquma, u pulita. Il-vera ġurdien xiħ.

Palin rebħet l-isfida personali tagħha, imma Biden rebaħ punti prezzjużi għad-Demokratiċi.

Domino Finanzjarju

2008-10-09T21:29:00.002+02:00

- Artiklu miktub fl-01 ta' Ottubru 2008 -

Il-kollass tas-sistema finanzjarja Amerikana, li bħad-dominoes istituzzjoni finanzjarja qed twaqqa’ lill-oħra, ġabet konsegwenzi globali li ma jistax ikun li ma jaffettwawx lilna wkoll.

Bdejna s-sena l-oħra bin-Northern Rock fir-Renju Unit. Segwew ftit tal-ġimghat ilu l-ażjendi Freddie Mac u Fanny Mae fl-Istati Uniti. Ġranet wara d-domino heżżet lil Lehman Brothers. Imbagħad il-kumpanija ta’ l-Assikurazzjoni A.I.G. ġimgha ilu smajna bil-Washington Mutual fl-Istati Uniti u Bradford and Bigley fir-Renju Unit. U din il-ġimgha smajna bil-bank Franko-Belġjan Dexia.

L-Amministrazzjoni Bush ipproponiet pjan ta’ salvazzjoni li se jiswa lil min iħallas it-taxxa s-somma ta’ $700 Biljun. Somma li tfisser kwart ta’ l-ispiża annwali li s-soltu jkollu l-Gvern Amerikan. Spiża li se jġorr il-poplu biex jagħmel tajjeb għall-iżbalji li saru fil-privat. Madankollu, li kieku l-Gvern ma jintervjenix, il-konsegwenzi jkunu devastanti aktar.

It-tagħlima minn dan kollu hi waħda. Is-sistema kapitalista, meqjusa minn kulħadd li hi l-aktar waħda li rnexxiet, mhix perfetta jekk ma tkunx regolata. U jekk tfalli twassal għal kollass devastanti. Li jwassalni għall-ħsieb finali. F’sistema kapitalista hija dagħwa li l-Istat jinterferi….imma dan m’għandu qatt jiġi interpretat li l-Istat m’għandux jintervjeni. Il-mekkaniżmi regolatorji issa hu ppruvat li ma kienux biżżejjed.

Appoġġ mill-Istudenti

2008-10-09T21:23:00.005+02:00

- Artiklu miktub fl-01 ta' Ottubru 2008 -

Laqatni ħafna appell li għamel lill-istudenti l-President ta’ l-MUT is-Sur John Bencini kmieni din il-ġimgħa.

Is-sur Bencini, meta kien qed jitkellem dwar il-kwistjoni li l-unjin tiegħu kellha mal-Gvern dwar l-istaff akkademiku ta’ l-Universita’, ġie rrappurtat li qal hekk: “Nappellaw biex l-għaqdiet li jirrappreżentaw lill-istudenti jagħtu appoġġ ċar lill-istaff akkademiku f’din il-kwistjoni.”

Interessanti. Interessanti ħafna. U interessanti aktar il-fatt li Bencini ħass li tali appoġġ kellu jitkarrab għalih. U la tkarrab għalih ifisser li ma tantx kellu ħjiel li dan se jasal waħdu. Ma kienx ikollu tilwima ma Gvern Laburista u jkun jinħtieġlu lill-istudenti jagħmlilhom tali appell.

F’tali ċirkostanza tali appoġġ kien jiġi b’mod immedjat mingħajr il-ħtieġa li jitkarrab għalih. U fost ta’ quddiem nett kien isib jinstigaw lill-istudenti sħabhom, lill-ulied il-Ministri u l-Prim Ministru. Mhux biss imma kien jarahom fuq quddiem fit-toroq imexxu l-kruċjata huma u hu jista joqgħod jistrieħ fuqhom.

Milli jidher, meta Bencini għamel l-appell tiegħu, quddiemu fil-miġemgħa ma kienx hemm studenti. Min jaf? Kieku forsi kien iqum xi wieħed minnhom u fil-preżenza ta’ ommu jghidli “f*** **f”.

Tsipi Livni

2008-10-09T21:15:00.005+02:00

- Artiklu miktub fl-29 ta' Settembru 2008 -

Il-partit politiku fil-Gvern Iżraeljan Kadima din il-ġimgħa ħatar lil Tsipi Livni, 50sena, omm ta’ żewġ ulied, bħala l-mexxej suċċessur il-ġdid tal-partit, u fi ftit tal-ġimgħat oħra mistennija tieħu postha bħala Prim Ministru minflok Ehud Olmert.

Il-ħatra ta’ Livni hija aħbar tajba, imma t-telfa tal-Ġeneral Mofaz, li kien qiegħed jimbotta politika aktar militanti u saħansitra jhedded li jista jattakka lill-Iran, tagħmel ir-rebħa ta’ Livni aħbar aktar tajba. Livni minn persuna ultra Nazzjonalista, wara perjodu bħala Ministru għall-Affarijiet Barranin resqet aktar lejn pożizzjoni moderata. It-trasformazzjoni tagħha waslet sal-punt li llum temmen fermament f’politika li twassal għal koeżistenza Għarbija/Lhudija.

Illum Livni hija meqjusa internazzjonalment bħala pedina importanti fil-proċess ta’ paċi. Għandha rapport tajjeb ħafna ma Mahmoud Abbas. U hemm sinjali li tista taħdem tajjeb ukoll ma Bashar al Assad. Il-problema għaliha madankollu tibqa dejjem il-Hamas. Dawn diġa ddikjaraw li l-ħatra tagħha mhu se twassal għall-ebda bidla.

Wieħed jittama li dak li ma rnexxielu ħadd jagħmel f’għoxrin sena, tagħmlu Livni…ftehim ta’ paċi dejjiemi mal-Palestina. Fl-opinjoni ta’ ħafna, jien wieħe minnhom, ma tista qatt id-dinja sserraħ rasha mill-inkwiet jekk ma tiġix riżolta l-kwistjoni tal-Palestina. Ħafna mit-trewwih fundamentalista reliġjuż madwar id-dinja jaf l-għeruq tiegħu lil din il-kwistjoni għax hemm min qed jinqeda biha għal skopijiet oħra. La darba tiġi riżolta l-kwistjoni Palestina, qisu wieħed skonnettja l-fuse minn mal-qalba ta bomba devastanti li tista tieħu ħin bla waqt.

Awguri Livni. Awguri Iżrael. Awguri Palestina.

Il-Protettur Brown

2008-10-09T21:05:00.006+02:00

- Artiklu miktub fl-29 ta' Settembru 2008 -

Il-Prim Ministru Ingliż Gordon Brown jista, u hekk hu fil-fatt, għaddej minn żmien mill-aktar diffiċli. Il-Partit Laburista Ingliż qed jaqta’ lura ħafna, u ilu jaqta’ lura ħafna, fil-popolarita’. Brown qed jiffaċċja tgergir intern li qatt ma kien hemm bħalu fil-partit. Qed jiffaċċja riżenji u qed jiffaċċja sfidi għat-tmexxija tiegħu meta kellu talbiet biex iħalli l-post ta’ mexxej.

Madankollu ammirajtu ħafna dan l-aħħar meta f’intervista li saritlu fuq stazzjon popolari televiżiv Ingliż, liema intervista segwejt b'interess kbir, huwa irrifjuta li jdaħħal l-familja tiegħu fid-diskussjoni, speċjalment fejn għandhom x’jaqsmu t-tfal. Huwa saħansitra jipproteġihom billi jirrifjuta li jkunu fotografati anki f’ambjenti u akkazzjonijiet soċjali li jkollhom.

Ammirajtu għaliex kuntrarju għal dak li kien jagħmel il-mexxej ta’ qablu, u kuntrarju għal dak li qed naraw iseħħ fil-kampanji politiċi li għaddejjin fl-Amerka, fejn it-tfal tal-politiċi jitqiesu bħala oġġett propagandistiku, Brown irid li uliedu jkollhom l-ispazju tagħhom. Brown jgħid li m’għandhomx ikollhom invażjoni f’ħajjithom. Jgħid li huwa hu li għażel li jidħol fil-politika u mhux uliedu. Mela huwa hu li għandu jkun skrutinizzat u mhux uliedu. Qal li uliedu għandhom dritt li jħossuhom tfal sakemm għadhom tfal. Għandhom dritt ikollhom rapport mal-ħbieb tagħhom bħal tfal oħra. U jibnu dan ir-rapport skond il-ħila tagħhom mhux skond ulied min huma. Qal li invażjoni mill-midja ma tħallihomx jibnu dan ir-rapport, u talab li uliedu jitħallew fil-kwiet.

Kemm għandhom x’jitgħallmu Sarah Palin u Barack Obama f’dan ir-rigward.

Ittra tal-Mistħija

2008-10-09T20:58:00.007+02:00

- Artiklu miktub fl-29 ta' Settembru 2008 -

Ġibditli l-attenzjoni ittra minn qarrej ta’ dan il-ġurnal li ġiet ippubblikata fil-ħarġa ta’ nhar il-Ħamis.

Xi ħadd ġibed l-attenzjoni li ħlas li kien dovut lill-Pulizija għal xogħol sahra li għamlu mal-banek f’Jannar meta seħħet il-qalba għall-ewro, għadu ma sarx. Qed nitkellmu disa’ xhur wara. Inġibdet l-attenzjoni wkoll li ħlas għal xogħol sahra li sar waqt l-elezzjoni ġenerali għadu ma sarx lanqas, meta qed nitkellmu sitt xhur wara.

Nixtieq nistaqsi kemm-il stonku hawn li jiflaħ joqgħod sitt xhur u disa’ xhur mingħajr ma jitrejjaq? Allaħares l-istonku tad-dipendenti kollha ta’ dawk li għandhom jirċievu dan il-ħlas kien jiddependi fuq dan il-ħlas għax kieku mietu kollha bil-ġuħ.

Nixtieq nistaqsi kemm-il Ministru, Segretarju Parlamentari, Segretarju Permanenti, Direttur Ġenerali, jew Direttur idum disa’ xhur biex jieħu ħlas li jkun dovut li jieħu?

Il-Konvenzjoni ta' Paul

2008-10-09T20:51:00.004+02:00

- Artiklu miktub fl-06 ta' Settembru 2008 -

Lura għall-politika Amerikana li bħalissa qed insegwi bil-kbir. Mhux biss kien x’għaddej fil-Konvenzjonijiet rispettivi imma anki lil hinn.

Kongressista Amerikan minn Texas, Ron Paul, li kien ukoll wieħed mill-kandidati Presidenzjali fl-elezzjonijiet primarji Repubblikani, għażel din il-ġimgħa li jsejjaħ Konvenzjoni għalih – ir-Republican Counter-Convention. Saret nhar it-Tlieta meta fil-Konvenzjoni Repubblikana sar l-intervent qasir awdjo-viziv ta’ Bush. Attendew ghall-Konvenzjoni ta’ Ron Paul 15,000 ruħ.

Ron Paul jagħmilha ċara li m’huwiex kuntent bil-politika attwali tal-Partit Repubblikan. Qed jitlob li l-partit jirritorna għall-għeruq ideoloġiċi tiegħu. Qed jgħid li jekk l-alternattiva għas-Soċjaliżmu tad-Demokratici ta’ Obama huwa l-faxxiżmu ta’ Bush u McCain, allura għandna gwaj kbir jistenniena.

Ron Paul qed jgħid li mhix l-intenzjoni tiegħu li jitlaq mill-Partit Repubblikan imma li juża l-fazzjoni li tappoġġjah biex jinfluwenza l-Partit Repubblikan biex jibdel ir-rotta u ma jkomplix jersaq lejn politika tal-lemin estrem. Wieħed jistenna x’se jiġri. Imma ma tkunx sorpriża li Paul jittanta xi avventura għal rasu u jikkontesta xorta waħda f’Novembru li ġej.

Fadalli x'noffri

2008-10-09T20:37:00.006+02:00

- Artiklu miktub fl-06 ta' Settembru 2008 -

Bqajt imbellaħ u imnixxef meta dan l-aħħar iċ-Chairman tal-Malta Tourism Authority Sam Mifsud konfrontat minn ġurnalista, wara li kien għadu kif stqarr li għalih l-ambjent m’huwiex prijorita’ għall-qasam tat-turiżmu, u wara talbiet li kien hemm għar-riżenja tiegħu, wieġeb li m’għandux intenzjoni li jirriżenja minn Chairman ta’ l-MTA għaliex iħoss li fadallu x’joffri.

Bqajt imbellaħ u imnixxef aktar meta qist li l-ereżija ta’ dikjarazzjoni li għamel Mifsud dwar jekk l-ambjent mhux prijorita’ għat-Turiżmu, għamilha fil-kuntest tal-kawża li għaddejja fil-Qorti in kwistjoni mal-każ skandaluż tal-Mistra, u dan biex ikun ta’ spalla għal xi ħadd li għaddejjin proċeduri kontrih. Huwa tal-mistħija aktar li Mifsud dan għamlu mhux biss biex jiddefendi ir-rapport li sar mill-MTA rigward l-applikazzjoni għal diskoteka fil-Mistra, liema rapport ma ħa l-ebda konsiderazzjoni ambjentali, imma agħar minn hekk ipprova jiġġustifika l-bini ta’ diskoteka billi jgħid li t-trammuntana tal-pajjiż hija nieqsa minn stabbilimenti ta’ divertiment meta m’huwiex il-każ.

Quddiem dan kollu tagħmel ħafna sens it-talba għar-riżenja tiegħu. Li ma jagħmilx sens hu li joħroġ hu u jgħid li m’għandux intenzjoni li jirriżenja għaliex għad fadallu x’joffri. F’sitwazzjoni bħal din, jekk wieħed għandux x’joffri aktar jew le mhux l-individwu konċernat għandu jaraha. Ħaddiehor. F’sitwazzjoni bħal din l-irġulija titlob riżenja. Imma le, donnha saret moda f’dan il-pajjiż tweġiba bħal din. Kull min ikollu talba biex jirriżenja iwieġeb li fadallu x’joffri. Bħal dak li qallu qatt miet Papa u l-Knisja ma tellgħetx ieħor. Bħal dak li qallu l-kwalitajiet ta’ dak li jkun huma tant uniċi li ma ssibhom f’ħadd iktar. Fejn hi l-etika professjonali? Fejn huma l-korrettezza, it-trasparenza, u l-akkontabilita’?

Il-fatt jibqa wieħed. Min jiżbalja hu mistenni minnu li jerfa r-responsabbilta’ ta’ l-iżbalji li jagħmel. Min jiżbalja u ma jerfax responsabbilta’, anzi jibqa’ jirreżisti kull talba li ssirlu, f’għajnejja huwa bniedem arroganti.

Distanza ta' Konvenjenza

2008-10-09T20:32:00.004+02:00

- Artiklu miktub fl-06 ta' Settembru 2008 -

Biż-żewġ Konvenzjonijiet Nazzjonali tal-partiti Amerikani magħluqa, dik tad-Demokratiċi l-ġimgħa l-oħra u tar-Repubblikani din il-ġimgħa, issa jinagħta bidu għall-aħħar sprint tal-kampanja li twassal tmien ġimgħat oħra għall-elezzjoni Presidenzjali tant mistennija.

B’George W. Bush ma jistax jerġa jikkontesta għaliex serva t-tieni term tiegħu, ir-Repubblikani fl-elezzjonijiet primarji li saru aktar kmieni din is-sena nnominaw lill-veteran John McCain bħala l-kandidat Presidenzjali tagħhom. Huwa se jiffaċċja lill-popolari avukat iswed Barack Obama li huwa l-kandidat nominat f’isem id-Demokratiċi.

John McCain u l-konsulenti Repubblikani tiegħu jafu tajjeb li t-tmien snin ta’ Bush m’humiex ta’ għajnuna fl-aspirazzjonijiet tagħhom għal erba’ snin oħra fil-Whitehouse. Bush m’huwiex figura popolari. Jafu li l-gwerra fl-Iraq, u l-kontroversji kollha li rriżultaw minnha, ma tistax tifridhom minn George Bush. U lanqas tista tifred ir-rekord ekonomiku ħazin li se jħalli warajh. Allura rraġunaw li l-uniku mod kif ma jitgħabbewx bid-dnubiet u n-nuqqas ta’ popolarita’ ta’ Bush huwa li jallontaw ruħhom minnu. Jitbiegħdu. Iżommu distanza.

Din it-tattika kienet evidenti ħafna nhar it-Tlieta fit-tieni jum tal-Konvenzjoni Nazzjonali Repubblikana. Qatt ma nżammet konvenzjoni ta’ partit politiku Amerikan li jkollu f’idejh il-Presidenza Amerikana u l-President ikun assenti minnha. George W. Bush fl-erbat ijiem tal-Konvenzjoni ma kien preżenti qatt fis-sala. L-uniku intervent li għamel kien indirizz qasir ta’ tmien minuti minn 900 mil il-bogħod, li għamlu permezz ta’ video link mill-Whitehouse.

John McCain ried jibgħat messaġġ li qiegħed jiddistanzja ruħu minn Bush. Fl-opinjoni tiegħi pero din hi biss distanza ta’ konvenjenza. Bush u McCain huma prodott simili mnebbħa mill-istess ħsibijiet u miri. Hija biss tattika politika. Mossa li tintuża sikwit. Mhux fl-Amerka biss. U l-iskop ikun li jiġu ngannati n-nies. Taparsi ma jaqblux…imma jkunu ħaġa waħda. Taparsi ma jarawx għajn m’għajn…imma jkunu ħbieb tal-qalb. Taparsi differenti…imma jkunu kopja ta’ xulxin. Taparsi flimkien ma jaħdmux…imma ma joqgħodux wieħed mingħajr l-ieħor. Politika tat-teatrini.

Tat-Tarzna u l-Kummissarju Spidla

2008-10-09T20:28:00.003+02:00

- Artiklu miktub fl-23 ta' Awwissu 2008 -

Nagħti applaws kbir u xieraq lill-Alternattiva Demokratika li kitbet lill-Kummisarju għax-Xogħol u l-Affarijiet Soċjali ta’ l-Unjoni Ewropeja Vladimir Spidla biex jinvestiga jekk il-pożizzjoni tal-Gvern Malti fir-rigward tat-Tarzna u l-impjegati tagħha tmurx kontra d-Direttiva ta’ l-U.E. numru 2001/23EC, liema direttiva llum saret parti integrali mill-liġijiet ta’ Malta. Din id-direttiva tgħid ċar x’inhuma l-obbligi soċjali li jridu jitħarsu fil-konfront tal-ħaddiema meta jkun hemm bdil ta’ idejn ta’ xi azjenda. Tgħid ċar li l-ħaddiema huma parti integrali mill-kumpanija li tkun se tinbiegħ, u min jixtri jrid jieħu lilhom ukoll u mhux jilliċenzjahom. Bil-miżuri li qiegħed jipprova jieħu l-Gvern dawn l-obbligi m’humiex jiġu rispettati, anzi qiegħed jagħmel minn kollox biex jiżloq mill-obbligi tiegħu.

Id-Dippressjoni

2008-10-09T20:23:00.003+02:00

- Artiklu miktub fl-23 ta' Awwissu 2008 -

Qrajt dan l-aħħar li sas-sena 2020 il-mard bid-dipressjoni se jkun l-iktar mard komuni fid-dinja. Qrajt ukoll li preżentament hu stmat li f’pajjiżna hawn aktar minn 10% tal-popolazzjoni li tbati minn mard ikkawżat minn dippressjoni. Li jfisser li f’pajjiżna għandna aktar minn 40,000 persuna marida. Il-problema hija akbar meta hu magħruf li minħabba stigma ħafna minn dawk li huma morda ma jersqux ‘il quddiem għall-kura. U hija akbar meta hu magħruf ukoll li konsegwenza ta’ tali mard ibatu l-membri l-oħra kollha tal-familja.

Fl-opinjoni tiegħi din hi sitwazzjoni li hemm ħtieġa urġenti li tiġi indirizzata. 40,000 persuna milquta jfisser li m’hawnx familja waħda f’pajjiżna, fil-qrib jew mhux daqstant fil-qrib, li b’xi mod m’għandhiex lil xi ħadd maqbud fil-problema. Ifisser mela li hija problema nazzjonali.

Imma milli jidher huma biss id-69 familja tal-membri parlamentari li huma ħielsa għal kollox minn tali gwaj!

Il-Konservattivi

2008-10-09T20:16:00.003+02:00

- Artiklu miktub fl-23 ta' Awwissu 2008 -

Min hu konservattiv hija fih li jirreżisti kull elementi ta’ bidla. Il-konservattiv jaħdem attivament biex jippriserva l-affarijiet u jħalli kollox kif inhu. Min hu konservattiv jirraġuna li la kif inhu jaf, u kif se jkun ma jafx, aħjar ma jieħux sogru…anki jekk addirittura jaf li kif inhu ma wasalx fit-tragward li kellu jasal u anki jekk jirriżultalu bil-fatti li ftit jista jasal.

L-elementi konservattivi f’Malta ftit jew ħafna kienu assoċjati dejjem mal-Partit Nazzjonalista. Huma partit li jżomm mat-tradizzjoni u meta ħtieġew li jinbidlu, għamlu dan bil-mod wisq u b’kawtela liema bħalha. Pero f’dawn l-aħħar snin inħakem ukoll minn elementi konservattivi l-Partit Laburista. U bil-kemm ma sarx konservattiv aktar minn Nazzjonalisti.

Ir-riżultat hu li l-Partit Nazzjonalista baqa jattira lejh il-voti tiegħu, u b’żieda magħhom voti oħra ta’ nies li bdew jaraw lill-Partit Nazzjonalista progressiv aktar mill-Partit Laburista.

Fl-opinjoni tiegħi r-riżultat ta’ l-aħħar elezzjoni ta’ l-Amministrazzjoni Laburista kien rebħa oħra għall-konservattivi. Anki jekk il-maġġoranza kienet favur il-bidla. Li jwassalni għall-appell sinċier tiegħi lil Joseph Muscat biex ma jaqtax qalbu u il-bidliet progressivi li jixtieq idaħħal jippersisti fuqhom u jdaħħalhom.

Minflok Riċetti

2008-10-09T20:09:00.006+02:00

- Artiklu miktub fl-23 ta' Awwissu 2008 -

Ngħid il-verita’ xbajt niftaħ stazzjonijiet lokali tat-tv u nara borom, taġnijiet, tisjir, u bejgħ sfurzat ta’ oġġetti li rari niġi bżonn. Xbajt nara tqanżih u medjokrita’. Tqallajt nara sfruttar u daħk bin-nies. Meta se nibdew nużaw dawn il-mezzi bis-sens? Meta?

Se nitkellem għal One TV għax jien dak li kkuntribwixxejt għalih. X’aħna nistennew biex għodda daqshekk b’saħħitha nibdew nużawha biex niddefendu biha lil min l-aktar jippretendi difiża mingħandna? Aħna partit politiku li għandna niddefendu lil min l-aktar għandu bżonn ta’ difiża. U għandna nużaw dawn il-mezzi biex naraw li noffru din id-difiża.

Per eżempju nixtieq jittella' programm li jkun difensur tal-konsumatur. Programm li l-konsumatur ikun jista jressaq l-ilmenti tiegħu u t-tim tal-programm jinvestigahom. Programm li jkun xewka għal min qiegħed jisfrutta lilna l-konsumaturi. Programm li jkun lest li jadotta policy ta’ name and shame. Nixtieq li l-istazzjon tagħna jieħu fama ta’ stazzjon difensur ta’ l-ambjent. U bi programm bi stil simili għal dak li semmejt aktar il-fuq ikun tassew difensur vera ta’ l-ambjent billi jikxef il-feriti li qed isiru fuq l-ambjent u min qed jagħmilhom. Programm li jitratta wkoll il-moħqrija fuq l-annimali u jperreċ bla ħabi ta’ xejn lil min hu bestja aktar mill-annimali.

Imma minkejja li nistenna fuq li nistenna, donnu qatt mhu se tinqata’ xewqti. Il-borom u t-taġnijiet dejjem jieħdu preċedenza.

Id-Divorzju

2008-10-09T20:07:00.013+02:00

- Artiklu miktub fl-23 ta' Awwissu 2008 -

Hemm bżonn ta’ aktar maturita’ fid-diskussjoni li għaddejja bħalissa dwar id-divorzju. Ma naqbilx ma min qiegħed jinkoraġġixxi li din il-kwistjoni tiġi deċiża b’referendum. Fl-opinjoni tiegħi ma jkunx ġust li d-drittijiet ċivili tal-minoranza jiġu sanzjonati minn kunsiderazzjonijiet tal-maġġoranza.

Jien l-ewwel wieħed li personalment jekk niġi bżonnu ma nagħmilx użu minnu. Dan minħabba kunsiderazzjonijiet personali. Imma min jien jien biex inżomm lil ħaddieħor milli jirrikorri għalih jekk jaħseb li dik tkun l-aħjar soluzzjoni fiċ-ċirkostanza tiegħu? Din hi soċjeta’ lajka u trid issir distinzjoni bejn dak li hu ċivili u reliġjon. Tagħmel sew il-Knisja li tħeġġeġ lill-membri tagħha biex iżommu mat-tagħlim tagħha, imma dawk li ma jħossuhomx marbuta b’dak it-tagħlim għaliex għandhom jibqgħu ibatu? Minn naħa l-oħra lanqas hu ġust li min jiflaħ iħallas jista' jġib id-divorzju minn barra, bl-istat Malti jirrikonoxxih, u min m’għandux mezzi biex jibda proċeduri barra jibqa' jbati.

Ħajja Infern

2008-10-09T20:07:00.012+02:00

- Artiklu miktub fl-23 ta' Awwissu 2008 -

Li l-ħajja saret għolja infern issa hija konfermata minn statistika uffiċjali. Iż-żieda li ġiet reġistrata fl-għoli tal-ħajja mis-sena l-oħra ‘l hawn kienet l-aktar waħda għolja f’għaxar snin. Żieda ta’ 5.6%. L-għola fl-Ewropa. F’pajjiż fejn il-pagi baqgħu relattivament iffriżati, u fejn il-ħaddiem huwa fost l-anqas imħallas fl-Ewropa, din iż-żieda toqros aktar fil-laħam il-ħaj. Ifisser li għall-istess affarijiet li kien jixtri sena ilu wieħed għandu għażla li jew iħallas 5.6% aktar milli kien iħallas, jew jekk m’għandux minn fejn iħallas jara kif jgħaddi mingħajr dawk l-affarijiet. Ifisser ukoll li n-nies qed jispiċċaw b’anqas flus fil-but u dawk li jiddependu totalment fuq il-paga qed jaraw il-paga tittiekel, jekk mhux tinbela’.

Hu ċar kristall li quddiem ħaġa bħal din il-Gvern jinsab ċass u impotenti. M’għandu l-ebda kontro miżura biex jilqa' għal din l-inflazzjoni. U lanqas għandu rieda. Mill-banda l-oħra jibqa' ma jagħmel xejn biex jara li l-ħaddiem jieħu l-kumpens li jimmeritah. Naħseb li wasal iż-żmien li min darba kien talab żieda ta’ Lm9 fil-ġimgħa jiftakar ftit f’dik it-talba bid-differenza li din id-darba jieħu daqsxejn oħra inkarigu jaqleb it-talba minn liri Maltin għal Euros.

Inkwiet Dinji

2008-10-09T20:07:00.008+02:00

- Artiklu miktub fl-23 ta' Awwissu 2008 -

L-aħbarijiet li kellna dan l-aħħar, u li għad għandna ġejjin, mill-Ossezja t’Isfel, l-Abkhazja, u l-konflitt bejn Georgia u r-Russja, il-qawmien mill-ġgdid tal-vjolenza fl-Afghanistan u l-qtil ta’ suldati Franċiżi u suldati Kanadiżi f’inċidenti separati, l-inkwiet li għaddej bħalissa fil-Pakistan wara r-riżenja ta’ Musharraf u l-vjolenza tat-Talibani mal-fruntiera, kif ukoll l-attakki mill-Al-Qaeda fl-Alġerija, iħassbu bil-kbir lil kull min jgħożż il-valuri tal-paċi.

Hemm ħtieġa li l-movimenti paċifisti fid-dinja iżidu l-għajta tagħhom favur il-paċi. Hemm ħtieġa li dawk favur il-paċi, li huma l-maġġoranza assoluta tal-popolazzjoni dinjija, jinżlu jimlew il-pjazez u jsemmgħu leħinhom. Anki hawn Malta avolja pajjiż żgħir. Min se jkun li se jibda?

Tat-Tarzna

2008-08-15T11:49:00.005+02:00

L-agħar ħaġa li tista tiġrilu bniedem li jkun totalment dipendenti fuq il-ġurnata tax-xogħol huwa li l-impjieg tiegħu jisfa insikur. L-inċertezza, il-qtiegħ il-qalb, it-tensjoni, il-biża’ mill-futur, l-għali li dawk li jiddependu minnek se jgħaddu minn żmien diffiċli, u l-preokkupazzjoni li wisq probabli xogħol alternattiv ma ssibx, lill-bniedem jħassbuh, ikidduh, u jherruh.

Il-ħaddiema tat-Tarzna bħalissa jinsabu għaddejjin propju minn din is-sitwazzjoni. Għaldaqstant, jien li bħalhom l-għejxien tal-familja tiegħi jiddependi totalment fuq il-ġurnata tax-xogħol, u aktar minn hekk bħala persuna li nimmilita fil-partit tal-ħaddiema, nissimpatizza magħhom bil-kbir u ħsibijieti kollha bħalissa huma fihom u fil-familji tagħhom.

Jekk tassew hemm ħaddiema żejda fit-Tarzna, wieħed jifhem li għandu jsir eżerċizzju serju biex jiġi stabbilit kemm għandha bżonn nies it-Tarzna u x’nies għandha bżonn. La darba tali eżerċizzju serju jkun lest, wieħed imbagħad għandu jgħaddi biex jassigura li kull ħaddiem ieħor li mhux possibli li jżomm postu fit-Tarzna jinstablu xogħol dinjituż alternattiv li jkun produttiv. Dan hu obbligu li kull gvern għandu jħoss fuqu, mhux fil-kaz tat-Tarzna biss imma f’kull każ.

Ikun ħela, meta nafu li t-Tarzna tagħna tipproduċi nies ta’ ħila bla qies f’dawk li huma snajja, jekk ma nassigurawx li l-ħiliet ta’ dawn in-nies ma nerġgħux nassorbuhom fid-dinja tax-xogħol. Ikun ħela aktar meta nafu li hemm Kunsilli Lokali jibku biex isibu nies bis-sengħa x’jimpjegaw.

Allura għaliex qiegħda tiġi skartata l-idea li jerġa jintuża l-mudell ta’ l-IPSL? Għaliex il-Gvern qed jisħaq biss fuq skemi ta’ irtirar kmieni? X’għandu f’moħħu eżatt il-Gvern? Mhux kontrosens li fl-istess nifs li l-Gvern iħeġġeġ kemm jista lin-nies biex jibqgħu fid-dinja tax-xogħol f’eta’ anki kbira, qiegħed iħeġġeġ nies oħra biex jirtiraw kmieni? Dan kollu meta jaf kulħadd li wegħda pre-elettorali Nazjonalista kienet saret biex isserraħ ras il-ħaddiema tat-Tarzna li mhux se jkun hemm tnaqqis ta’ nies mill-azjenda. Mhux daħq fil-wiċċ dan?

L-awgurju tiegħi hu li l-buon sens u r-rieda tajba jipprevalu f’din il-kwistjoni.

Elezzjoni kull xahar

2008-08-15T11:41:00.004+02:00

Ħafna jilmentaw li għandna wisq elezzjonijiet f’din in-naqra ta’ gżira. Għandna medja ta’ aktar minn elezzjoni fis-sena. Kull sena għandna elezzjoni tal-Kunsilli Lokali, elezzjoni kull ħames snin għall-Parlament Ewropew, u elezzjoni oħra kull ħames snin għall-Parlament Malti.

Minn statistika uffiċjali li ġiet pubblikata riċentament jidher ċar li mhux talli m’għandniex għalfejn nilmentaw li għandna medja ta’ aktar minn elezzjoni kull sena, talli wieħed jagħmel tajjeb jekk nibdew nikkunsidraw biex inżiduhom. Sa anki nisseġġerixxi elezzjoni Ġenerali kull xahar. Għaliex?

Statistika uffiċjali uriet li matul ix-xahar ta’ l-elezzjoni Ġenerali din is-sena il-qgħad naqas bi 865. Dan meta mqabbel ma l-istess xahar ta’ sena qabel. B’hekk issa in-nies qgħeda jammontaw għal 6138. Li jfisser, b’matematika sempliċi, li kieku jkollna elezzjoni kull xahar, bir-rata ta’ impjiegi li taf iġġib magħha l-elezzjoni Ġenerali, il-figura ta’ nies qgħeda jirnexxielna nisparixxuha għal kollox f’seba’ xhur.

Mhux li kien jaħasra tibda tissejjaħ elezzjoni Ġenerali kull xahar. Tagħmel tant mirakli elezzjoni Ġenerali jaħasra, x’iżomm lill-Gvern milli jieħu dan is-suġġeriment? Tad-daħk, mhux għax kieku tal-biki.

Irreżisti Karl

2008-08-15T11:37:00.003+02:00

Qed nikteb dan l-artikolett propju f’jum għeluq it-43 sena ta’ siehbi Karl Chircop. Jum li matulu qiegħed jissielet l-akbar battalja, u għal ħafna meqjusa l-aħħar battalja ta’ ħajtu.

Realistikament kulħadd jaf li l-qagħda ta’ Karl hija waħda serja ħafna. Madankollu tibqa' dejjem it-tama li fuq kollox u fuq kulħadd hemm Alla li jista' kollox. U la jista' kollox jista' anki jippermetti miraklu fuq Karl.

Ibqa' irreżisti Karl. Ibqa iġġieled. Iċċedix għalissa. Aħna lkoll miegħek fit-talb tagħna.

Kemm dubji kelli, telqu

2008-08-15T11:23:00.004+02:00

Ngħid il-verita’ kelli l-impressjoni, aktar u aktar wara dak li rajt fil-kampanja elettorali ta’ Frar/Marzu li għadda, li aħna tal-Labour privi minn ċerti kapaċitajiet meta kkomparat man-Nazzjonalisti. Mhux se nistħi ngħid. Kont żbaljat.

Kelli l-impressjoni li aħna inkapaċi nużaw b’mod effettiv il-mezzi ta’ komunikazzjoni moderni. Kont naħseb li email ma nafux x’inhi. Li lanqas nafu li jeżistu l-blogs. Li m’aħniex napprezzaw kemm eluf ta’ nies illum jorbitaw kontinwament f’dan il-mezz elettroniku. Kont żbaljat. Fit-tlielaq kollha interni li kellna dan l-aħħar intbaħt li nafu nużawhom sew. Ħafna wkoll. Allura kieku intużaw bl-istess mod effiċjenti u bl-istess saħħa fl-elezzjoni ġenerali ma konniex forsi jaħasra niskansaw telfa elettorali oħra?

Kelli dubju wkoll nafux x’inhu telefon ċellulari, u jekk nafux li hemm mezz kif tikkomunika bl-sms’s. Le ta. Fit-tlielaq interni tgħidx kemm messaġġi kuljum irċevejt. Allura kieku użajnihom bl-istess intensita` fl-elezzjonijiet esterni bħalma użajnihom f’dawk interni ma konniex naqtgħu figura aħjar?

Kieku irsistejna ma' nies, bit-telefon u b’mezzi oħra, biex joħorġu jivvutaw fl-elezzjoni ġenerali daqskemm insistejna fl-elezzjonijiet interni, ma kienx jirnexxielna minn 7000 Laburist li ma vvutawx nikkonvinċu 2000 minnhom jivvutaw?

Kieku l-kuntatt personali, għal darba tnejn tlieta mad-delegati, rajna li jsir bl-istess mod ma' l-elettorat xettiku qabel l-elezzjoni, ma kienx ikun aħjar? Jew forsi kien hemm min serraħ rasu b’rebħa ta’ 17,000? Kemm aħna kapaċi intelqu bejnietna!! Ma jirbħilna ħadd!!

Dikjarazzjoni

2008-08-01T12:38:00.005+02:00

Inħoss f'dan il-mument li d-delegati tal-Konferenza Ġenerali tal-Partit Laburista jimmeritahom spjegazzjoni ċara għad-deċiżjoni tiegħi li nirtira mit-tellieqa għal Segretarju Ġenerali.

Nagħmilha ċara li mhix fin-natural tiegħi, li wara kampanja bħal dik fejn kont qed inwassal messaġġ ċar ħafna, liema messaġġ deher li kien qed jintlaqa' tajjeb, naqbad u nirtira. Mhix fin-natural tiegħi lanqas kieku il-messaġġ ma kienx qed jintlaqa', aħseb u ara.

Nagħmilha ċara wkoll li ma kienitx deċiżjoni faċli...u jista jkun li hemm ħafna fostkom li ma jaqblux. Madankollu inserraħ ras kulħadd li d-deċiżjoni kienet ibbażata BISS fuq kunsiderazzjoni waħda....l-interess tal-Partit qabel l-interess ta' kull aspirazzjoni personali li jista’ għandi.

Nagħmilha ċara wkoll li l-irtirar tiegħi ma kien kundizzjonat minn xejn u minn ħadd.

Tul il-kampanja, kull fejn mort u ma’ kull min iltqajt, inbuttajt 'il quddiem il-ħtieġa li t-tiġdid li inbeda fil-Partit jitkompla. Fehimt lil kulħadd li l-Partit Laburista jinħtieġlu jirrispondi b'mod assertiv għal din il-ħtieġa tal-bidla. Għidt ċar li jekk irridu li nsiru mill-ġdid Partit Rebbieħ hemm bżonn li nerġgħu insiru dixxiplinati, organizzati u effettivi.

Ma tantx kelli għalfejn nitħabat wisq biex inwassal dan il-messaġġ. Kull fejn mort u ma kull min iltqajt sibt li l-maġġoranza assoluta tad-delegati...u aktar minn hekk il-maġġoranza assoluta tal-membri u l-partitarji....jixtiequ li l-proċess ta' tiġdid u bidla fil-Partit ma jixxekkilx. Pero kienu inkwetati li fid-dawl ta' kif inhi l-votazzjoni il-fatt li kkontestajna ħafna kien se jkun kontro-produċenti. Ħriġna ħafna biex nippromwovu l-bidla u dan kien qed jipperikola l-istess bidla.

Jiena nemmen li r-rieda tal-maġġoranza assoluta tad-delegati aħna l-kontestanti kellna nieħduha in konsiderazzjoni. Tħabadt kemm flaħt ma sħabi biex nillimitaw in-numru għax inkella r-rieda tad-delegati li jaraw il-bidla ma kenitx se sseħħ, u dan għaliex l-appoġġ ta' dawk favur il-bidla kien se jinqasam fuq ħafna.

Kien għalhekk, emmnuni, u għalhekk biss, li b'sens ta' rispett lejn id-delegati, u biex ir-rieda tagħhom ma tiġix imxekkla, bl-ikbar sens ta' lealta' lejn l-interessi tal-partit li għalija jiġi QABEL kull interess politiku personali, ħassejt li kelli inkun jien...u miegħi sieħbi Gino Cauchi...li nirtira n-nominazzjoni, biex dak li ltqajt miegħu fil-laqgħat ma narahx isir suf.

Naturalment, diżappuntat ħafna fuq livell personali egoistiku li kelli nkun jien li ħadt dan il-pass...u sieħbi Gino. Diżappuntat ukoll li iddiżappuntajt lil ħafna li emmnu fija. Nitlobhom skuża imma xi ħadd ried ikun. U nispera li ma inqast lil ħadd. Nassigurakom, ħarist BISS lejn l-interessi tal-Partit.

Inwiegħed li xorta waħda, fil-limitazzjonijiet tiegħi, nagħmel kull ma nista’ biex Elezzjoni oħra naraw mill-ġdid lill-Partit rebbieħ.

Grazzi lil kulħadd ta' l-esperjenza sabiħa li għaddejtuni minna tul din il-kampanja. Grazzi talli lqajtuni. Grazzi talli għallimtuni. Grazzi fuq kollox tax-xogħol kollu li tagħmlu fil-Partit.

Saħħiet

Joe Chetcuti

Il-mistħija li tkun fuq ix-xellug

2008-07-22T18:21:00.005+02:00

Kurt Sansone jintervista lil Joe Chetcuti

Niltaqa’ ma’ Joe Chetcuti ftit jiem wara li l-Bord tal-Viġilanza u d-Dixxiplina qatagħha li kien se jkun diskriminat jekk jitwaqqaf milli jikkontesta għall-kariga ta’ segretarju ġenerali għax ma kienx delegat.

Bis-saħħa ta’ dik id-deċiżjoni nfetaħ il-bieb mhux biss għal Chetcuti imma wkoll għal oħrajn li mhumiex delegati u xtaqu jikkontestaw għal xi kariga fl-amministrazzjoni jew bħala membri ta’ l-eżekuttiv.

“Sodisfatt ħafna li bl-insistenza tiegħi wassalt biex il-partit jinfetaħ iktar,” jgħidli b’ħarsa ta’ sodisfazzjon.

Il-kelma ‘ftuħ’ hi fuq fomm Chetcuti. Kemm-il darba tul l-intervista jitkellem dwar il-ħtieġa li l-partit jinfetaħ ħalli mhux biss jersqu lejh nies ġodda imma wkoll iħossuhom komdi jitkellmu.

Iżda l-kelma ‘ftuħ’ hi akkumpanjata wkoll millkelma ‘dixxiplina’. Iż-żewġ kelmiet flimkien idarrsuni u meta nistaqsih x’irid ifisser meta jinsisti fuq ‘dixxiplina’ it-tweġiba tiegħu hi pronta. Jagħtini l-impressjoni li ħafna huma dawk li qed jistaqsuh l-istess ħaġa.

“Kull organizzazzjoni trid tkun effettiva u biex tilħaq dan l-għan trid tkun organizzata. Imma biex tkun organizzat trid tkun ukoll dixxiplinat.

“Hemm bżonn tidħol lura d-dixxiplina fil-partit. Mhux dixxiplina militari imma dixxiplina ta’ impenn. Meta niddeċiedu li xi ħaġa għandha ssir, din issir, minn min għandu jagħmilha, fil-ħin u kważi perfetta. Jekk irridu nikkonvinċu jeħtieġ inkunu kredibbli u l-kredibbiltà tinbena jekk dak li niddeċiedu dwaru nwettquh.

“Ir-rapport tat-telfa jindika numru ta’ deċiżjonijiet li ttieħdu tul iż-żmien u li qatt ma ġew esegwiti. Ma nistgħux nippermettu sitwazzjoni hekk.” Chetcuti jkompli jispjega li hu naturali li f’partit politiku se jkun hemm nies b’fehmiet u ħsibijiet differenti.

“Imma nixtieq noħloq atmosfera komda għal kulħadd fejn persuna tkun tista’ tikkritika u tesprimi l-opinjoni tagħha mingħajr il-ħtieġa li testerna d-dissens. Persuna trid tħossha mismugħa,” jgħid Chetcuti.

Chetcuti, li kien kandidat għall-elezzjonijiet ġenerali kollha mill-1992 sa l-2003, jemmen li l-partit għandu bżonn bidla sħiħa fl-uċuh.

“Jekk qatt kien hemm elezzjoni li kellna nirbħu kienet din u għalhekk ħassejt it-tqanqil biex nikkontesta għax minkejja l-ħtieġa ta’ bidla fil-pajjiż il-partit xorta baqa’ l-art. Irraġunajt li biex il-partit jippreżenta ruħu bħala l-partit tal-bidla jrid jitbiddel hu wkoll u għalhekk nemmen li hemm bżonn ta’ skjerament ġdid ta’ nies.”

"Nixtieq noħloq atmosfera komda
għal kulħadd fejn persuna
tkun tista’ tikkritika u tesprimi
l-opinjoni tagħha mingħajr
il-ħtieġa li testerna d-dissens.
Persuna trid tħossha mismugħa."

Chetcuti jgħid li jrid jara l-politika tal-partit tinħema minn isfel għal fuq b’sehem sħiħ talkażini u l-għeruq tal-partit. Mil-laqgħat li qed ikollu mad-delegati hu impressjonat bit-talenti u l-argumenti li jagħmlu xi wħud.

“Li ma nistax nifhem hu kif imbagħad tiġi l-konferenza ġenerali u din tkun sempliċiment rubber stamping. Hemm bżonn li l-każini nagħtuhom l-ispazju fejn jaħdmu u nħeġġuhom jieħdu l-inizjattiva. Ċert li b’hekk tibda tinbidel il-kultura fil-każini li dawn huma biss post fejn jiltaqgħu n-nies biex jieħdu birra jew jilagħbu l-billiards,” iwieġeb meta nistaqsih kif jista’ jkun li tinbidel il-kultura tal-bar f’ħafna mill-każini.

Jinsisti li l-partit iċċentralizza wisq il-ħidma tiegħu u saħansitra anki l-laqgħat politiċi filkażini spiċċaw organizzati b’mod ċentrali. “Dan m’għandux ikun,” itenni.

“Hemm bżonn li ideat innovattivi jitħalltu ma’ ideat eżistenti. Jiddispjaċini li tul dawn l-aħħar snin il-Partit Laburista donnu beża’ jew staħa jiddikjara li hu partit Xellugi,” jgħid Chetcuti.

Nistaqsih jaqbilx ma’ l-introduzzjoni taddivorzju.

“Naqbel anki jekk personalment ma nkunx lest nagħmel użu minnu. Imma jien min jien biex inwaqqaf lill-ħaddieħor? Diskussjoni bħal din għandu jibdiha l-Partit Laburista. Aħna partit Xellugi, partit progressiv u d-drittijiet ċivili għandhom ikunu parti integrali mill-politika li nħaddnu,” jargumenta Chetcuti. Jemmen ukoll li l-impenn personali li ħa Joseph Muscat fuq id-divorzju għandu eventwalment ikun l-impenn tal-partit kollu wara diskussjoni filkonferenza ġenerali.

L-ikbar mistoqsija fl-aħħar elezzjoni hi marbuta mal-vot ikbar ta’ astensjoni li kien hemm. L-elettorat ipprefera jsabbat saqajh milli jivvota MLP. Għalfejn?

“Fl-aħħar elezzjoni n-nies riedu bidla imma ma ħassewhomx assigurati li din setgħet issir blalternattivi li kellhom quddiemhom. Għalhekk ma vvutawx Labour,” iwieġeb.

Chetcuti jgħid li Muscat ħoloq żiffa friska li qed tappella lil dawn in-nies u ż-żmien għad jagħti raġun lill-mexxej għad-deċiżjonijiet li qed jieħu u li setgħu ħasdu lil xi Laburisti.

Nistaqsih kif il-partit se jirnexxilu jirrikonċilja l-votant tradizzjonali Laburist mal-klassi l-medja fit-tramuntana tal-pajjiż li l-iktar li sabbtet saqajha f’Marzu li għadda.

“Ir-riżultati mat-triq se jikkonvinċu lil-Laburisti li Joseph Muscat għandu raġun. Se jkun kapaċi li jagħmel alleanza sħiħa man-nies li jixtiequ jaraw bidla fil-mod kif issir il-politika. Muscat b’li għamel fl-ewwel ġimgħat tiegħu ħasad lin-nies tagħna. Imma l-azzjonijiet tiegħu se jwasslu biex firxa iktar wiesa’ ta’ nies tersaq lejna għax huma ħafna dawk li ilhom jistennew politiku bħalu li jaħsibha differenti.”

U dwar l-għażla ta’ Peppi Azzopardi fuq il-Kummissjoni ta’ l-Etika li waqqaf Muscat?

“Konvint li Joseph Muscat irid jagħmel biċċa xogħol tajba u ma jridx jorbot idejh. Irid ikun f’pożizzjoni li jista’ jagħmel alleanzi ma’ kulmin lest jaħdem miegħu. Fl-għażla ta’ Peppi Azzopardi nemmen li ħa deċiżjoni tajba. Għamel sew u naqbel miegħu.

“Jien kemm-il darba ktibt biex nikkritika lil Peppi. Bħala persuna li hu fil-lenti pubblika
għandu jaċċetta din il-kritika bħalma jien ukoll irrid naċċetta li nista’ nkun kritikat u taħt skrutinju. Kif jgħidu bl-Ingliż ‘if you can’t stand the heat get out of the kitchen’.”

Kulmin se jinħatar Segretarju Ġenerali, flimkien mal-mexxej il-ġdid, se jkollu jiffaċċa t-test elettorali ta’ Ġunju 2009 meta jkunu eletti d-deputati parlamentari Ewropej Maltin.

“Tieħu gost tirbaħ kull tellieqa u filwaqt li għajnejna jridu jkunu fuq ir-rebħ ta’ l-elezzjoni għall-Parlament Ewropew wasal il-mument ukoll li naħsbu ftit iktar fit-tul. Tajjeb li nirbħu kull battalja imma l-iktar importanti li nirbħu l-aħħar waħda, li hi l-iktar importanti: l-elezzjoni ġenerali.”

It-tweġiba tiegħu fiha ħafna x’tifhem. F’dawn l-aħħar ħames snin fil-Partit Laburista tnissel sens ta’ kunfidenza għax rebaħ kull appuntament elettorali li kellu sa qabel l-elezzjoni ta’ Marzu.

“Kellna sens ta’ over confidence injettat artifiċjalment minn nies li kkalkulaw li se jirbħu,” jgħidli.

Nistaqsih hux qed jirreferi għal Jason Micallef. B’nofs tbissima u bi kliem diplomatiku għallaħħar Chetcuti jinsisti miegħi li r-rapport tat-telfa jsemmi ħames persuni mhux wieħed.

"Aħna partit Xellugi, partit
progressiv u d-drittijiet
ċivili għandhom ikunu parti
integrali mill-politika li
nħaddnu."

Naqbadlu fuq il-fazzjonijiet fil-partit li jissemmew ukoll fir-rapport tat-telfa bħala sors ta’ inkwiet kontinwu.

“Il-fazzjonijiet bil-mod il-mod qed jiddiżintegraw. Muscat irnexxielu joħloq sens ta’ entużjażmu ġdid li jissupera l-ħafna diżgwid intern,” iwieġeb.

Jissorprendini. Possibbli jemmen li l-fazzjonijiet marbutin ma’ personalitajiet qed jiddiżintegraw?
“Għalhekk għedtlek bil-mod il-mod. Imma l-mexxej ta l-ikbar eżempju bl-għajta tiegħu ta’ merħba lil kulħadd. Hekk għandna bżonn biex jinfetħu l-istrutturi tal-partit. Jien nemmen f’mexxej b’saħħtu, viżjonarju li jippermetti lil kulħadd iħossu parti mill-partit. Imma l-mexxej jibqa’ wieħed.”

Bħala segretarju ġenerali Chetcuti se jkun lest jieħu l-istess impenn li ħa s-Segretarju Ġenerali tal-PN Paul Borg Olivier dwar il-każini maqbudin bil-liġi tal-kera l-antika u jirrofta d-dritt tassuċċessjoni?

“Il-kwistjoni tiddependi mill-eżekuttiv. Li hu żgur hu li l-MLP qatt mhu se jieħu pożizzjoni li tidher jew li hi illegali,” jgħidli.

Ninsisti miegħu li din mhix kwistjoni ta’ legalità imma kwistjoni ta’ moralità politika.

“Moralment kull pożizzjoni li tista’ tittieħed trid tiġi deċiża u maqbula id f’id mal-proposta tal-finanzjament tal-partiti.”

Ma nifhimx kif waħda torbot ma’ l-oħra imma jidher li fuq il-kwistjoni tal-kera fil-Partit Laburista teżisti ċerta skumdità. Chetcuti jitkellem dwar il-ħtieġa li l-partiti politiċi jkunu finanzjati mill-Istat imma jinsisti li min iħallas it-taxxa għandu jkollu rasu mistrieħa li dawk huma finanzi li qed imorru biex jiffinanzjaw il-ħidma politika tal-partit.

“Hekk in-nies isserraħ rasha wkoll li l-partiti mhux qed jaħdmu bi flus xi ħadd li jmur iħabbat il-bieb meta mbagħad ikollu bżonn pjaċir. Niskoraġġixxi kull tip ta’ donazzjonijiet ġenerużi li ’l quddiem jistgħu jippreġudikaw il-pożizzjonijiet politiċi li nistgħu nieħdu bħala partit. Hemm bżonn ta’ regoli ċari li jiżguraw it-trasparenza.”

Qabel ma nitilqu lil xulxin nistaqsih jekk jarax kunflitt bejn ir-rwol ta’ segretarju ġenerali u d-deputat mexxej għall-affarijiet tal-partit u jekk jarax lilu nnifsu bħala segretarju politiku jew amminsitrattiv.

“Inkun kontra li jispiċċa r-rwol ta’ deputat mexxej għall-affarijiet tal-partit."

L-istatut jgħid ċar u tond fejn tibda u tieqaf il-ħidma tas-segretarju ġenerali u tad-deputat mexxej. Iż-żewġ rwoli huma kumplimentari u jridu jaħdmu b’sinerġija imma għandhom żewġ funzjonijiet distinti.

“Bħala segretarju ġenerali nemmen li l-persuna trid tkun amministratur u organizzatur tajjeb imma b’qafas politiku sod. Is-segretarju ġenerali jrid jisma’ ħafna iktar, jitkellem xi ftit inqas u jaħdem ħafna iktar.”

Kliem li għal darb’oħra fih ħafna x’tomgħod!

"Jien kemm-il darba ktibt biex nikkritika
lil Peppi. Bħala persuna li hu fil-lenti
pubblika għandu jaċċetta din il-kritika
bħalma jien ukoll irrid naċċetta li nista’
nkun kritikat u taħt skrutinju. Kif jgħidu
bl-Ingliż ‘if you can’t stand the heat get out
of the kitchen’."

Illum 20 ta Lulju 2008

Messaġġ ta' Għaqda

2008-07-15T13:38:00.006+02:00

Il-Partit Laburista għandu bżonn jissaħħaħ, jinbidel, u jsir aktar pożittiv. Dan għandu jagħmlu għalih innifsu, imma aktar minn hekk għall-pajjiż.

Pajjiżna għandu bżonn bidla sħiħa. Bidla fil-mod kif nindirizzaw il-problemi qodma li ilhom magħna. Bidla kif niffaċċjaw l-isfidi ġodda li jiġu fuqna. Bidla sħiħa fil-mentalita’ u l-mod kif nagħmlu l-politika.

Irridu nkunu aħna tal-Partit Laburista, imħeġġa u msaħħa b’Mexxej ġdid żagħżugħ bħalma hu Joseph Muscat, li noffru din il-bidla. Pero biex inkunu aħna li nagħmlu dan irridu nerġgħu nibdew nirbħu. U biex nirbħu rridu naħdmu għal aktar għaqda fil-partit tagħna. Partit mhux magħqud biżżejjed ma jirbaħx elezzjonijiet. U biex jirnexxielna niġbru biżżejjed nies madwarna li jwassluna għal rebħa rridu l-ewwel ningħaqdu u nissodaw minn ġewwa.

Kull min jafni lili jaf li qatt ma skjerajt ruħi f’xi fazzjonijiet. Qatt ma kont persuna diviżiva. U jaf ukoll li dejjem ippruvajt, fejn inqala xi saram bejn wħud, inberred u nikkalma. Għaldaqstant nikkonsidra lili nnifsi bħala persuna li m’għandi problemi ma ħadd.

Bħala Segretarju Ġenerali, jekk intom id-delegati tisilfuni l-fiduċja tagħkom, se naħdem bla serħan biex dan il-partit inkomplu nissodawh minn ġewwa u ninsab kunfidenti li nista' nkun il-persuna li ngħaqqad.

Irrid li mill-pożizzjoni li nkun nimpennja ruħi li nkun strument li jressaq lil kulħadd lejn xulxin. Irrid li terġa' tidħol lura, u se naħdem biex terġa' tidħol lura s-serenita` fil-partit tagħna.

Ejja nkomplu nagħmlu dak kollu possibbli biex dan il-perjodu li għaddejjin minnu ikompli jkun perjodu ta’ suċċess billi naraw li tassew terġa' tibda tirrenja għaqda sħiħa u soda.

Dejjem Tiegħek,
Joe Chetcuti

Dixxiplinati - Organizzati - Effettivi

2008-07-14T03:26:00.005+02:00

Dan iż-żmien eċċitanti ta’ tiġdid li għaddej minnu l-Partit Laburista, imbuttat qabel kulħadd mill-Mexxej innifsu Joseph Muscat, qed jindika minn daqshekk kmieni li dan il-partit mhux fi żmien wisq il-bogħod se jkun qiegħed jissetja aġenda għalih li ma jgħaddix wisq żmien li l-pajjiz ukoll ma jagħmilhiex aġenda tiegħu.

Joseph Muscat, bi kliemu u b’għemilu, qed jibgħat diversi messaġġi li jrid partit miftuħ. U bir-raġun. Għaliex dan il-partit għandu bżonn jiftaħ u jinfetaħ. Għandu bżonn jiftaħ beraħ il-bibien kollha tiegħu ħalli aktar nies iħossuhom komdi jidħlu ġewwa. Għandu bżonn jiftaħ l-istrutturi tiegħu ħalli demm ġdid jitħallat ma' dak eżistenti. U jiftaħ id-diskussjoni ħalli l-ideat li hemm, kontrastati ma' ideat oħra ġodda u innovattivi, isawru linja ġdida ta’ ħsieb li tant hi meħtieġa fiż-żminijiet tal-lum.

Imħeġġeġ mill-fatt li l-Partit Laburista jinħtieġlu jirrispondi b’mod assertiv għal din il-ħtieġa tal-bidla, u konvint li tali risposta tkun aktar kredibbli bi skjerament ta’ nies ġodda, qiegħed inpoġġi jien id-dispożizzjoni totali tiegħi għall-Partit billi nikkontesta mill-ġdid għall-kariga ta’ Segretarju Ġenerali tal-Partit.

Għidtha kemm-il darba u nerġa' ngħidha li biex nirbħu rridu nkunu ħafna aktar effettivi. Pero biex inkunu effettivi rridu bilfors inkunu organizzati. U biex inkunu organizzati rridu bilfors inkunu dixxiplinati. Għax mingħajr dixxiplina la nkunu organizzati wisq anqas effettivi. U din hi l-għajta li se mmexxi tul din il-kampanja fost id-delegati tal-Konferenza Ġenerali: Dixxiplinati, Organizzati, Effettivi.

Għidtha drabi oħra u nerġa nirrepetiha li biex nirbħu rridu naħdmu għal aktar għaqda fil-partit. Dawk kollha li tassew iridu l-bidla f’dan il-pajjiż ma jkollhomx garanzija li l-bidla li tant jixtiequ qatt tista sseħħ jekk ma jarawx Partit magħqud biżżejjed. Għaldaqstant nimpennja ruħi biex inkun strument li jressaq lil kulħadd lejn xulxin. U ninpennja ruħi biex nara li kulħadd ifittex li jkun parti mis-soluzzjoni mhux parti mill-problema. Għax jekk ikollna ħafna li jirrendu lilhom infushom bħala parti mill-problema ikollna problema kbira, imma jekk kulħadd ifittex li jkun parti mis-soluzzjoni tinstab soluzzjoni tajba.

Nemmen li l-bażi ta’ dan kollu li semmejt hawn fuq hija s-serjeta’. Irridu nkunu serji f’dak kollu li nagħmlu. Li tkun serju jfisser li l-affarijiet tħares lejhom bis-serjeta’, tanalizzahom bis-serjeta’, tiddeċidihom bis-serjeta’, u twettaqhom bis-serjeta’. Jekk wieħed jabbanduna s-serjeta’, is-serjeta’ tabbandunah.

Nemmen ukoll li min ikun f’kariga amministrattiva hemm bżonn li jisma’ ħafna aktar, jitkellem ftit anqas, u jaħdem ħafna u ħafna aktar.

Nemmen li fil-Partit, bit-triq rikonciljatorja li qiegħed jurina l-Mexxej, u bi skjerament ta’ nies li jappoġġjaw din il-linja, tista' tinħoloq klima interna serena fejn minkejja li huwa naturali li wieħed jista' ma jaqbilx ma' xi ħaga, xorta waħda jibqa' jħossu komdu bħala parti mill-familja, u xorta waħda jħossu li jappartjeni.

Nemmen ukoll li hemm ħtieġa immedjata u kbira fil-Partit għal bidliet. Wħud minnhom kbar, oħrajn izgħar. Bidliet kemm statutorji, kemm strutturali, kif ukoll f’dak li huwa kontenut.

Nemmen ukoll fil-kuntatt kontinwu ma' l-għeruq biex ma ninqatgħux minnhom, u mal-kumplament tas-soċjeta` kollha kemm hi biex nersqu aktar lejn aktar nies.

Nemmen fuq kollox, u bis-sħiħ, fiż-żgħażagħ tagħna. Fil-potenzjal tagħhom. Fil-ħeġġa u l-enerġija tagħhom. Fil-kapaċitajiet tagħhom. Nemmen fihom għaliex huma l-preżent u l-futur tal-Partit. Fuqhom u madwarhom irid jinbena kollox. Imma nemmen ukoll fil-veterani, u dawk mhux daqstant veterani, għaliex huma dawn li joffru stabbilta’ lill-Partit. Nemmen ħafna fil-lealta’ tagħhom. Fl-għerf tal-ħajja tagħhom. U fl-esperjenza tagħhom. Allura rridu noħolqu ambjent fejn il-veterani tal-Partit ikunu l-boxxla li fuqha wieħed jaqra d-direzzjoni, filwaqt li ż-żgħażagħ preżenti, u dawk li rridu nattiraw, ikunu l-forza l-ġdida tal-Partit biex ixettlu u jnibbtu ideat ġodda u innovattivi. Il-veterani għandhom xi ħaġa li ż-żmien biss jagħtik…l-esperjenza, filwaqt li ż-żgħażagħ għandhom ħaġa li f’dik l-eta’ n-natura qatt ma tixxaħħah miegħek fuqha…l-enerġija. B’taħlita tat-tnejn jitwettqu ħwejjeġ kbar.

Konvint li l-istaġun politiku ġdid li qiegħed jinbotta ‘l quddiem. Il-mexxej tagħna se jkun qiegħed jistimula dawn il-bidliet kollha fil-Partit. U konvint li l-iskop tagħhom se jintlaħaq u naslu fejn għandna naslu. Konvint li fi żmien mhux il-bogħod se inkunu forza politika kbira li tagħti lil dan il-pajjiż stil ta’ politika differenti. Se inkunu forza politika kbira li tkaxkar magħha lil dawk kollha b’ideat progressivi li jridu jaraw bidliet sostanzjali fis-soċjeta’ tagħna. U se tkun forza politika kbira li tħaddan magħha wkoll lil dawk li, anki jekk moderati fil-fehma tagħhom, jaqblu li wasal żmien it-tibdil.

Fl-interess tad-demokrazija

2008-07-14T02:49:00.007+02:00

Artiklu li ktibtu fil-25 ta' Marzu 2008

1. Elezzjoni Mitlufa… Dan hu l-ewwel artiklu tiegħi minn meta r-riżultat ta’ l-elezzjoni sar magħruf. Elezzjoni li lilna l-Laburisti ħallitilna togħma mill-aktar morra. Ħafna morra. Tlifna elezzjoni li ma kellna qatt nitilfu. U dik hi l-kelma eżatt….tlifna l-elezzjoni aħna mhux rebħuha n-Nazzjonalisti. Min ikun fil-gvern dejjem x’jitlef għandu. U min ikun fil-gvern għal 20 sena sħaħ għandu ħafna x’itelfu għaliex in-nes tgħejja. U tibda tixba u tiddejjaq minnu. Tibda anki tgħolli rasha l-arroganza u tnebbet il-korruzzjoni. Kif fil-fatt ġara. Diġa 20 sena kienu aktar minn wisq, aħseb u ara ħamsa oħra magħhom. Madankollu l-Labour ma kienx kapaċi jirbaħ. Tilef xorta. U kaġun tat-telfa tiegħu, it-tmexxija tal-gvern reħgġet ġiet konsenjata lin-Nazzjonalisti, minkejja li naqsu eluf ta' voti, biex spiċċaw rebħu elezzjoni li qatt ma setgħu jirbħu. X’ikkaġuna din it-telfa? Huma ħafna l-fatturi. U trid issir tfittxija bir-reqqa għalihom dawn l-iżballji. Pero jiżballja min jipprova jfittex r-raġunijiet x’imkien ieħor il-barra miċ-Ċentru Nazzjonali Laburista. M’hemm l-ebda raġuni esterna akbar mir-raġunijiet interni. Xi ħadd, jew xi wħud, x’imkien għamel jew għamlu l-iżballji. Jieħu għalih min irid… Il-‘Bidu Ġdid’ issa hemm bżonn li jseħħ ġewwa l-ewwel…qabel nitħajjru nesportawh 'il barra. U biex tiġġedded trid tibdel u tinbidel. Wara 20 sena fil-gvern huwa suppost il-partit tal-gvern li mar fl-oppożizzjoni jiġġedded u jinbidel. Hekk jiġri f’demokraziji normali u b’saħħithom. U huwa fl-interess tad-demokrazija li l-Partit Laburista jiġġedded, jinbidel u jissaħħaħ malajr kemm jista' jkun ħalli jkun jista' jirbaħ elezzjoni. Imbagħad ikun imiss lill-Partit Nazzjonalista li jmur fl-oppożizzjoni jippurifika ruħu, u dan fl-interess ukoll tad-demokrazija. Altrimenti ikollna, bħala poplu, nitqannew nibqgħu ngħixu ħafna aktar snin f’dittatura demokratika.

2.Is-Sistema Elettorali… Jekk vera rridu li ngħixu f’demokrazija ħajja u mħux f’waħda moribonda, irridu nizguraw li jkollna sistema elettorali fejn fiha kull fehma espressa permezz tal-vot tiġi riflessa fir-riżultat. Is-sistema li għandna hija tilqita a la Maltija, iddettata minn numru ta’ okkazzjonijiet fejn fihom kellna riżultati perversi, pero b’tifsila li taqdi lill-partiti l-kbar a skapitu taż-żgħar. Pero jekk mingħalina li sibna l-aħjar formula, ikolli ngħid li din l-elezzjoni tipprova l-affarijiet bil-maqlub. Għax fil-verita’ l-aħħar riżultat elettorali jindika ċar li l-maġġoranza assoluta tan-nies ta’ Malta u Għawdex ma riditx lill-partit Nazzjonalista fil-gvern. Anzi riditu fl-oppożizzjoni. Pero maġġoranza kemm kemm żgħira akbar ma ratx lill-Partit Laburista bħala gvern alternattiv. X’ġara? 1500 vot, jiġifieri 1500 individwu li vvutaw lil partit kbir u mhux lill-ieħor, iddeċidew id-destin ta’ pajjiż għal ħames snin, fl-istess waqt li ammont ferm akbar ta’ individwi li la vvutaw Labour u lanqas lill-Partit Nazzjonalista l-vot tagħhom ma sewa xejn. Lil dawn għidnielhom ċar u tond ‘Ojj, stajtu bqajtu d-dar bħal ħaddieħor’. Ġusta ħaġa bħal din? Le mhix. Tagħmel sens meta kellna riżultat daqstant viċin u inċert? Le, ma tagħmilx. U dan mhux qed ngħidu issa wara l-elezzjoni. Kont nirraġuna bl-istess mod minn qabel. Għax nemmen li fl-interess tad-demokrazija hemm bżonn insiru bħal demokraziji oħra. U biex insiru hekk hemm bżonn tibdil radikali fis-sistema elettorali tagħna. Ma nistgħux ngħidu li l-ewwel preferenzi huma dawk li jgħoddu…fejn jirrigwarda l-partiti l-kbar, imma imbagħad ma jgħoddux fil-każ tal-partiti ż-żgħar. Mingħalina ħloqna sistema li tagħmilna l-aktar pajjiz demokratiku tad-dinja, imma fil-verita’ ħloqna farsa li għandha bidu imma le tmiem. Irridu niddeċiedu x’se nieklu. Jekk hux pranzu bħan-nies….jew il-gaxin li sajjarna f’dawn l-aħħar snin.

3.Eżami tal-Kuxjenza… Wara r-riżultat elettorali li għadna kif kellna huma ħafna li jinħtiegilhom jagħmlu eżami tal-kuxjenza. Mhux l-anqas, il-Partit Nazzjonalista. L-ewforija ta’ rebħa li qatt ma kellha tkun m’għandux iwassalhom biex jaħsbu li kollox ward u zahar. Jew li l-MLP issa spiċċa. Altru milli hekk. Il-poplu bħalma bagħat messaġġ ċar lill-Partit Laburista, bagħat ieħor lill-Partit Nazzjonalista. Il-poplu qalilhom li bihom huwa imdejjaq ukoll. Il-Partit Nazzjonalista, iva, rebaħ id-dritt legali li jiggverna…la darba gvern irid ikun hemm….pero m’għandux l-appoġġ morali u l-fiduċja tal-maġġoranza tal-Maltin u l-Għawdxin. U huwa żball kbir ħafna li l-Partit Nazzjonalista qiegħed japprofitta ruħu mill-fatt li l-oppożizzjoni għadha storduta biex jieħu deċizjonijiet kontraversjali, mingħajr ma jitqajjmu mingħalih kontroversji. Għajb kbir għalih li qed jaddotta din it-tip ta’ strateġija. Għajb għaliex jidher ċar li l-opportuniżmu politiku qiegħed jirbaħ fuq is-serjeta’ u l-interess nazzjonali. Għajb akbar għaliex dan ifisser li Gonzi ma tgħallem xejn mil-lezzjonijiet li ried jagħti l-elettorat bil-vot tiegħu.

4.Pjaċiri… Ħaġa li minn dejjem kienet, u saret aktar, tmarradni hija l-mewġa ta’ pjaċiri bla sens li jsiru hekk kif tasal elezzjoni. Pjaċiri li jħallu effett negattiv kultant ekonomiku, u kultant ambjentali. Xi drabi temporanji u ħafna drabi permanenti. Għalija dawn huma atti tal-mistħija li kont tagħhom irid jingħata quddiem Alla. L-ammont ta’ permessi tal-bini li jinħargu malajr malajr hekk kif toqrob l-elezzjoni, u wisq aktar malli titħabbar, huwa xokkanti. Ir-riżultat fuq l-ambjent ta’ Malta? Jarah b’għajnejh kulħadd u m’għandix għalfejn ngħidu jien. Xi ngħidu mbagħad għall-impjiegi u l-promozzjonijiet. Tal-mistħija. Naf b’dipartiment governattiv li xhur ilu ħareġ sejħa interna biex jimtlew numru ta’ postijiet fi grad partikolari. Kien hemm bżonn numru. Sar eżami. Għaddew mill-eżami ħafna u ħafna aktar min-numru meħtieġ. Il-loġika tgħidlek li jieħdu l-promozzjoni dawk li kkwalifikaw ‘il quddiem san-numru li kien hemm meħtieġ. Mhux hekk? Imma tafu x’ġara? Ġimagħtejn qabel l-elezzjoni taw il-promozzjoni lil kulħadd. Affarijiet ma jitwemmnux. Affarijiet li darba xi ħadd pprova jbellagħhielna li hekk kif insiru parti mill-Unjoni Ewropea, ma jsirux aktar. Mhux aħna l-Maltin imma! Aħna nġibu l-Ewropej bħalna, u mela huma jibdlu lilna! Aħna poplu korrott li jekk tneħħilu l-korruzzjoni jiġrilu bħal dik il-ħuta li toħroġha barra mill-ilma. Lanqas biss nafu ngħixu mingħajrha. Phuu għalina.

Il-Midluk

2008-07-14T02:43:00.005+02:00

28 ta' Ġunju 2008

Sakemm tigu biex taqraw dan l-artiklu l-għażla tas-Segretarju Ġenerali li se jieħu post Joe Saliba fil-Partit Nazzjonalista tkun magħrufa uffiċċjalment. Fil-mument li qed nikteb dan l-artiklu pero, minkejja li naf min hu l-midluk, uffiċċjalment għadu ma ġiex ikkonfermat li l-midluk fil-fatt indilek. U minkejja li s-sorpriżi dejjem jistgħu jitwettqu, ma tkun sorpriża xejn jekk dalgħodu jiġi nikkonferma ruħi illi wara disa’ snin fil-PN irritornat is-sitwazzjoni fejn il-kariga ta’ Segretarju Ġenerali tkun okkupata minn membru parlamentari.

Li l-affarijiet fil-Partit Nazzjonalista isiru b’dan il-mod mhix spekulazzjoni. Kien l-Ewroparlamentari Simon Busuttil li pubblikament stqarr li hu kien ġie avviċinat minn Lawrence Gonzi u martu Kate biex jidħol hu minflok Joe Saliba. Li jfisser li fil-partit Nazzjonalista, mhux talli l-għazla ma jagħmluhiex il-Kunsilliera tal-Kunsill Ġenerali imma numru aktar ristrett fl-Eżekuttiv, talli fil-verita’ din l-għazla tkun pre-indikata mill-Kap innifsu.

Simon Busuttil pero irrifjuta. U stqarr pubblikament li rrifjuta. Biex il-midluk ħalla lill-Prim Ministru ifittex ieħor biex jidilku. U l-midluk l-ieħor instab f’dak li għal ħafna, imma mhux għall-ftit li kienu konvolti, kien il-persuna sorpriża li tefa’ n-nomina bla mistenni.

Jekk dalgħodu l-affarijiet jirriżultaw mod ieħor, u ċioe’ il-midluk baqa’ ma ndilikx, allura Lawrence Gonzi għandu ma wiċċu sitwazzjoni kbira ta’ imbarazzament. Jekk mill-banda l-oħra l-għazla irriżultat biss f’konferma tal-midluk, fl-opinjoni tiegħi l-imbarazzament tal-Prim Ministru għandu jkun akbar.

Mill-banda l-oħra, anki jekk jidher li għadu kmieni ħafna, jidher ċar li ż-żejt tal-balzmu għall-ħatra tal-Kap li jmiss tal-partit diġa’ huwa ppreparat. U l-idejn li se jagħmlu d-dilka se jaraw li meta jasal il-waqt Simon Busuttil ma jgħidilhomx le. Konferma ta’ dan kollu toħrog minn artiklu li kiteb ftit taż-żmien ilu Robert Musumeci fuq The Times. Musumeci ħassu fl-obbligu li jinfurmana li “ There is no doubt that Simon Busuttil, who will probably be the next party leader, would have been fit for this (General Secretary) job.”

Is-sabiħa hi li minn dak in-nhar ‘l hawn, u naħseb li ħallejt żmien aktar minn biżżejjed, fatti ċari ta’ manipulzzjoni din il-kwalita’ ma jsibux ruħhom fiċ-ċentru tad-diskussjoni pubblika. ’differenza minn meta Malta kollha waqfet biex tiddiskuti jekk l-għazla ta’ mexxej fil-Partit Laburista għandhiex titwessa minn 900 delegat għal 19,000 tesserat.

[J]agħmel [P]ropju [O]ppost

2008-07-14T02:33:00.012+02:00

28 ta' Ġunju 2008

Meta kulħadd kien qed jistenna li l-Onorevoli Jeffrey Pullicino Orlando jagħżel l-aktar triq onorabbli li kellu quddiemu, ċioe’ dik li jirrizenja minn Membru tal-Parlament, tafu xi spiċċa jagħmel? Jagħmel Propju Oppost.

Meta kulħadd, saħansitra opinjonisti ta’ kull ġurnal u editorjament il-ġurnali kważi kollha li hawn f’pajjiżna, kien qed jaqbel li aktar ma jagħlaq ħalqu Jeffrey Pullicini Orlando, aktar aħjar, tafu xi spiċċa jagħmel? Jagħmel Propju Oppost.

Wara tliet xhur ta’ skiet u dehriet mill-anqas, u wara li l-Pulizija ħabret li ser tieħu passi kontra tliet persuni fil-każ tal-Mistra imma mhux kontra sid l-art li l-aktar kien se jibbenifika, inkiser l-iskiet u JPO bdejna narawh fuq kull stazzjon, ġurnata iva ġurnata le, jipprova jgħidilna kemm kien vittma ta’ Alfred Sant.

Il-verita’ hi li dan JPO la kkonvinca lili, la lilek, u lanqas lil ħadd. Tant li ħareġ saħansitra l-Prim Ministru jistqarr li ma seħħ xejn ġdid li lilu jġiegħlu jibdel id-deċiżjoni politika li ħa dwar JPO. Ċara u tonda.: JPO ma rebaħx lura l-fiduċja tal-Prim Ministru. Mhux biss. Imma b’dak li stqarr il-Prim jiġi kkonfermat li l-Prim illum hu konvint, jekk ma kienx addirittura konvint anki mill-bidu, li JPO politikament għandu x’jirrispondi. Jiġi konfermat ukoll,b’dak li qal il-Prim, li lura f’Marzu li għadda jew huwa ġie żgwidat għal kollox minn JPO, jew it-tnejn li huma, flimkien ma Joe Saliba, żgwidaw lill-poplu. Jew waħda, jew l-oħra.

Biex l-affari issa tkompli tieħu dimensjonijiet drammatiċi, jumejn ilu l-Mepa irtirat il-permess tal-Mistra għaliex saħqet, mingħajr ma kellha għalfejn tistenna l-eżitu tal-proċeduri li se jibdew fil-Qorti, li kien hemm ksur tal-liġi fil-ħruġ tal-permess.

U hawn fejn nasal għall-punt li rrid nisħaq fuqu llum. Fl-opinjoni tiegħi hemm spjegazzjonijiet politiċi kbar x’jiġu spjegati f’dan il-każ. U l-obbligi politiċi li jridu jiġu ċċarati m’għandu jerfagħhom ħadd għajr il-Prim Ministru nnifsu. Kulħadd qed jistenna mill-Prim Ministru li jikser is-skiet kważi totali li żamm bi skuza li kienu għaddejjin l-investigazzjonijiet mill-pulizija. L-investigazzjonijiet issa ilhom mitmuma mhux ħażin. U allura issa l-ballun mhu imkien għajr f’ħoġru. Wara kollox kien hu stess li f’intervista ma' The Times kien stqarr li la darba l-pulizija tikkonkludi l-investigazzjonijiet tagħha, huwa se jitkellem. U issa x’ġara? Gonzi qed Jagħmel Propju Oppost b’periklu kbir li minflok Gonzipn in-nies tibda ssejjaħlu Gonzijpo

Gonzi irid iżomm f’moħħu li minn issa ‘il quddiem kull vot li jgħaddi fil-parlament, wara sejħa għal division, se jkun qed jgħaddi bil-vot ta’ dik il-persuna li żgwidatu…jekk żgwidatu. Kull vot li jgħaddi se jkun għadda bil-vot ta’ dik il-persuna li ma tgawdix il-fiduċja tiegħu…jekk tassew ma tgawdix il-fiduċja tiegħu. Kull vot li jgħaddi se jkun qed iserraħ fuq dik il-persuna li skond Joe Saliba nnifsu ma jmisshiex qiegħda fil-parlament għax li kien għalih irriżenjat.

Quddiem sitwazzjoni bħal din huwa interessanti ħafna naraw kif se jaġixxi Gonzijpo. L-irġulija politika tiddetta li jiċċensura lill-Onorevoli membru li fuqu qed iserraħ. Pero naraw fuq kollox hux se Jagħmel Propju Oppost.

Pawlu u l-Ħondoq

2008-07-13T15:56:00.024+02:00

14 ta' Ġunju 2008

Għal ħafna żmien Paul Buttigieg, il-Kunsillier Laburista tal-Qala, seta’ ħassu mholli waħdu jimbotta ‘l quddiem il-kampanja kontra l-qerda ta’ l-isbaħ bajja f’Għawdex, Ħondoq ir-Rummien. Pero
ħaġa ta’ l-iskantament, aktar ma beda jsib xkiel ma' wiċċu Pawlu kien beda aktar iżid fid-determinazzjoni tiegħu, anki meta dan l-ixkiel beda ġej minn nies li tant kien qed jistenna appoġġ minnhom. U fejn ħaddieħor seta faċli jaqta' qalbu, Pawlu beda aktar iżid fil-kuraġġ li jippersisti sa l-aħħar.

Niftakar konna flimkien Brussel għal żjara politika qasira, u fil-ftit jiem li għamilna hemm irranġa, bl-għajnuna ta’ dak li llum hu l-mexxej ġdid laburista, laqgħa ma' l-istaff ewlieni tal-Kummissarju Ewropew għall-Ambjent u ppreżentalhom ruxxmata dokumenti dwar il-każ. Niftakar li tant kien sodisfatt bih innifsu dakinhar li stajt nara f’għajnejh li ftit kienu dawk l-okkazzjonijiet l-oħra f’ħajtu, apparti episodji ta’ natura personali u familjari, li tawh sodisfazzjon daqshekk.

Erġajt ftakart f’Pawlu din il-ġimgħa meta waqt il-programm Dissett Joseph Muscat esprima ruħu totalment kontra l-iżvilupp ta’ Ħondoq ir-Rummien. U stajt, nilmaħ mingħajr ma kien quddiemi, wiċċ Pawlu sodisfatt hekk kif dlonk intebaħ li m’għadux aktar leħen solitarju fid-deżert.

Is-sinjura Daphne

2008-07-13T15:56:00.023+02:00

14 ta' Ġunju 2008

Is-Sinjura Daphne, li jien u għaddej nikteb għaddej f’konflitt intern jekk għandix noqgħod naħli ħin u spazju fuqha, nhar il-Ħamis għoġobha tikteb artiklu mill-aktar baxx u dispreġġjattiv fuq il-mexxej il-ġdid laburista meta dan lanqas kien ilu ġimgħa f’postu. Immaġinaw naqra f’ġimgħa dan x’seta’ għamel biex inkurlaha daqshekk.

Għandha kull dritt tikteb li trid, biex nifthemu. Imma l-qarrejja tagħha għandhom dritt daqsha li jkollhom l-inteligenza tagħhom rispettata wkoll. L-anqas li wieħed kien jistenna minnha hu li tkun prudenti, tistenna ftit taż-żmien, u l-analizi tagħha fuq il-persuna tal-mexxej il-ġdid u l-operat tiegħu tagħmilha meta dan ikun sab saqajh u telaq bil-ħidma tiegħu. Li jfisser allura li la kienet daqshekk imprudenti, il-mara kitbietha hija iddettata biss minn odju għal dak kollu li hu laburista. U li kieku minflok Joseph Muscat fit-tmun tal-partit tela’ Papa Benedittu, għalih kien ikun hemm riservat l-istess referenzi baxxi u odjuzi li kellha maħżunin għal Muscat.

Li jwassalni allura għal dak li rrid nasal għalih. Appell lill-editur ta’ The Malta Independent. Sur editur, tajjeb li lili l-ewwel wieħed, u lil ħafna oħrajn bħali, tilluminani ftit jekk tali kitbiet immaturi u prematuri għandhomx il-barka tiegħek. Tajjeb tilluminani ftit ukoll jekk hux gost u pjaċir tiegħek li tħallas artikolista l-belli lira biex toqgħod tivvomta fuq in-nies u tweġġa' s-sentimenti ta’ dak li jkun b’artikli barra minn lokhom. La darba nkun illuminat, inkun f’pożizzjoni nasal għad-deċizjoni jekk għandix nibqa' nonfoq 37 cents kuljum biex bihom jitħallas xi ħadd li quddiem l-istedina sinċiera ta’ Muscat biex il-politika nagħmlu minnha konfront nadif ta’ ideat u ħsibijiet, jirreaġixxi b’dak l-aktar mod pastaż u vulgari.

Għażiża Michelle

2008-07-13T15:55:00.009+02:00

14 ta' Ġunju 2008

Wara kull persuna ta’ suċċess għandek issib mill-anqas persuna oħra li jkollha mertu daqsha jew kważi f’dak is-suċċess. Il-Mexxej il-ġdid Laburista, li minn hawn nieħu l-okkazzjoni biex nifraħlu u nawguralu, m’huwiex eċċezzjoni. Fost ħafna nies li hemm wara s-suċċess ta’ Joseph, mingħajr ma jieħu għalih ħadd, bla dubju l-aktar persuna influwenti kienet martu Michelle.

Lil Michelle, minħabba relazzjoni familjari, ili nafha madwar 30 sena. Kienet għadha tifla bil-kemm rifset l-għatba ta’ l-iskola. Konna inqattgħu s-sajf ngħumu fil-bajja tal-Fekruna, b’missierha Michael iħassrilna l-gost tal-vaganzi għax il-ħin kollu ifakkarna li l-qari u l-istudju m’għandhomx vaganzi. Jien, l-aktar tifel imfarfar mit-tfal kollha li konna nkunu fil-kamra tas-sajf tiegħu, kont l-aktar wieħed li nobdi. Imma għax kont drajtu li jekk nobdi kien hemm premju lest għalina….dawra bil-luzzu tiegħu sal-Gzejjer ta’ San Pawl.

Imbagħad għadda ż-żmien u lil Michelle rajtha taħdem fil-partit, fejn saret taf lil Joseph. Dak iż-żmien kont is-Segretarju tas-Sezzjoni Kandidati tal-partit. Kienet tagħti daqqa t’id kull fejn meħtieġ. U kull ma tagħmel, tagħmlu sew. Għax taf xi trid tagħmel, u taf kif għandha tagħmlu sew. Hija persuna enerġetika, determinata, u attenta. U bil-personalita’ tagħha tiddomina uffiċċju u tistimola lil kull min ikun magħha u viċin tagħha.

Michelle mhijiex biss, u mhux se tkun biss, il-mara li tappoġġja lil żewġha. Li tagħmillu kuraġġ. U li takkumpanjah soċjalment fejn hemm bżonn. Imma hija spalla politika soda. Għaliex apparti li hija akkademikament dotata, hija wkoll persuna li l-politika tafha sew.

F’dan il-mument hekk sabiħ f’ħajjitha, imma fuq kollox mument sabiħ ukoll għall-partit tagħna, nixtieqha tippermettili pubblikament nitlobha tibqa dejjem attenta fuq żewġha. Ma titilqu qatt minn taħt għajnejha. Biex ma jkunx hemm min ikun ta’ xkiel għalih u għal dak kollu li jirrappreżenta. Toqgħod attenta li ma jkun hemm ħadd, anki jekk l-intenzjoni tiegħu jew tagħha ma tkunx dik, li b’għemilu jew bil-preżenza tiegħu ixekkel lil Joseph mill-għan ewlieni tiegħu li jwassal lill-partit u lill-pajjiż għal staġun politiku tassew ġdid.

Perswaz li dan se tagħmlu, u se tagħmlu b’suċċess.

Ġimgħa llum

2008-07-13T15:50:00.011+02:00

31 ta' Mejju 2008

Bhal-lum gimgha l-Partit Laburista ikollu l-mexxej il-gdid f’postu. M’hemmx dubju li d-delegati, li kollha vot wiehed ghandhom, u minn hamsa validi wiehed jew wahda iridu jaghzlu, ghandhom xijmeximxu. Pero taqa’ fuq min taqa’ l-ghazla, l-ghazla tad-delegati trid tittiehed minn kulhadd li hi l-ahjar. Dik li lkoll rridu nappoggjaw u nimxu warajha.

Dak li ser jigri minn gimgha ohra ‘il quddiem huwa bil-bosta aktar importanti minn kull haga ohra li grat sa issa. U min kull haga ohra li setghet grat sa issa u ma gratx. Fl-opinjoni tieghi l-klima interna wara il-5 ta’ Gunju se tindikalna lkoll x’se jkunu l-prospetti laburisti f’elezzjoni ohra.

Ghaldaqstant nemmen li dak kollu li spjegajt hawn fuq dwar ghaqda u dixxiplina ghandu jkun prijorita’ fost l-prijoritajiet tal-mexxej il-gdid. U l-ewwel wiehed li jrid jibda jahdem ghalihom huwa l-mexxej il-gdid. Billi hu stess jibghat l-ewwel sinjali posittivi. Billi ma jistriehx qabel ma jaccerta ruhu li ma jhallix dawk l-elementi divizivi li jistghu ixekklu lill-partit. Billi jara li kulhadd jinaghta l-ispazju tieghu skond l-hiliet u l-abbiltajiet li ghandu. Billi jidhol personalment biex jitfejjqu l-feriti kollha. U billi jinjetta mill-gdid sens ta’ ottimizmu u kunfidenza.

Mexxej tajjeb minghajr dawn il-kwalitajiet ma jibqax tajjeb. Ghax biex tmexxi trid l-ewwel taghraf kif se timxi int. Fiducjuz li se jkollna mexxej tajjeb li jaghraf jimxi hu u jaf imexxi tajjeb. Minn qalbi awguri lil Gorg, lil Evarist, lil Marie Louise, lil Michael u lil Joseph. Pero ma jiehu zgur hadd ghalih jekk l-akbar awgurju nirriservah lill-Partit Laburista.

Indixxiplinati

2008-07-13T15:46:00.005+02:00

31 ta' Mejju 2008

Biex il-Partit Laburista jittrasforma lilu nnifsu mill-gdid bhala partit rebbieh, apparti li tirritorna l-ghaqda, irid jara li jsir aktar effettiv f’dak kollu li jaghmel. Pero biex inkunu aktar effettivi, irridu bilfors inkunu aktar organizzati. Imma biex inkunu organizzati, irridu bilfors inkunu dixxiplinati. Ghax minghjar dixxiplina la inkunu organizzati wisq anqas effettivi.

Wiehed ma jridx wisq sforz biex jinnota li bhala partit sirna wisq indixxiplinati. U dan irrendiena anqas organizzati, u anqas effettivi. Ma jistax ikun li din l-indixxiplina tibqa ghaddejja, Ma jistax ikun li kulhadd jibqa jaghmel dak li jfettillu, jghid dak li jigih f’mohhu, jew jagixxi skond kif jiddettawlu l-interessi personali.

Irridu inkunu awto-dixxiplinati. Meta wiehed jitkellem fuq dixxiplina mhux necessarjament ikun irid ifisser dixxiplina regimentali. Dik li tkun gejja minn fuq ghal isfel, bil-kap kmandant bil-bastun f’idu jordna u kulhadd irid jobdi. Le. Imma dixxiplina fil-forma ta’ awto-dixxiplina. Fejn kull individwu jinfliggi fuqu nnifsu sens li hu jippartjeni minn organizzazzjoni u li l-interessi ta’ l-organizzazzjoni jissopravivu fuq kull interess iehor. Sew personali jew xort’ohra.

Meta qed nitkellmu fuq awto-dixxplina qed nitkellmu fuq dixxiplina ta’ commitment. Ta’ impenn. Jigifieri meta nikkommettu ruhna li ser naghmlu xi haga, din issir…issir b’impenn…fil-hin stipulat…u li ssir tajjeb mhux bizzejjed imma ssir kwazi perfetta. Tfisser ukoll li f’dak li taghmel qatt ma tabbanduna l-principju tas-serjeta’. Ghax jekk wiehed jabbanduna s-serjeta’, is-serjeta’ tabbandunah.

L-indixxiplina twassal ghal nuqqas ta’ organizzazzjoni, nuqqas ta’ effettivita’, nuqqas ta’ serjeta’. L-awto-dixxiplina tisserjak, torganizzak, u taghmlek effettiv.

Għaqda sħiħa

2008-07-13T15:41:00.007+02:00

31 ta' Mejju 2008

Nibqa' ntenni sakemm nispicca bla vuci li jekk il-Partit Laburista ma jinaghqadx, anki elezzjoni ohra jerga jitlef. Jistghu mhux ixebbghu nies in-nazzjonalisti, nistghu nipprezentaw kemm irridu l-aqwa proposti lill-poplu Malti u Ghawdxi, u nistghu mhux ikollna l-aqwa u l-ahjar mexxej… ghax jekk ma ninghaqdux m’ghandniex l-icken cans li nirbhu.

Tant hi mehtiega l-ghaqda li nittama f’mexxej gdid li mhux biss ikun l-aktar persuna unifikanti, imma nittama wkoll li jkollu d-dehen u l-forza kollha mehtiega biex l-elementi kollha divizivi li hemm fil-partit jeleminahaom.

Importanti hafna li min jemmen fl-ghaqda, u kull min jghid li jemmen fl-ghaqda, jekk tassew jemmen hekk, jara li bi kliemu u b’ghemilu jkun strument li jressaq lil kulhadd lejn xulxin. Min bi kliemu u b’ghemilu jaghmel xort’ohra, ifisser li qed ikun parti mill-problema. U f’dan il-mument huwa importanti li wiehed jara li jkun parti mis-soluzzjoni mhux aktar parti mill-problema. Ghax jekk ikollna aktar nies li jirrendu ruhhom parti mill-problema, se jkollna problema akbar. Bil-kuntrarju, jekk aktar nies ifittxu li jkunu parti mis-soluzzjoni, tinstab soluzzjoni tajba.

Importanti hafna, jekk tassew irridu l-ghaqda, illi l-ambjent ta’ bejnietna ma jkunx kontaminat. Importanti li l-atmosfera interna ma tkunx wahda li taqtalek nifsek u tifgak. Trid tinholoq atmosfera fejn wiehed ihossu komdu. Fejn il-kunfidenzjalita tkun salvagwardjata. Fejn hadd ma jkollu ghalfejn juri d-dissens tieghu barra l-istrutturi tal-partit. Sitwazzjoni li tqarreb lejn l-eleminazzjoni tal-leakages li hemm illum.

Jekk tirritorna l-ghaqda jikber ir-rispett ta’ wiehed ma l-iehor u nkunu f’posizzjoni li naghmlu uzu tajjeb mir-rizors uman kollu taghna. Mill-kbir saz-zghir. U fil-livelli kollha.

ABBACOFAMU

2008-07-13T15:31:00.013+02:00

03 ta' Mejju 2008

Fadal xahar ghall-elezzjoni ta’ Mexxej gdid ghall-Partit Laburista. Xahar twil fejn kulhadd se jkun qieghed jiffoka aktar harstu fuq il-hames kontendenti. M’ghandi l-ebda dubju li kull Laburist li ghandu ghal qalbu l-partit, f’dawn l-erba’ gimghat li fadal se jkun qieghed ghassa ghall-hames kontestanti biex jara x’sinjali kull wiehed minnhom se jibghat biex juri l-kapacita’ tieghu li jghaqqad lill-partit.

Minn issa sal-5 ta Gunju, Abela, Bartolo, Coleiro Preca, Falzon u Muscat, kull wiehed u wahda minnhom iridu juru bic-car li ghandhom il-kwalitajiet li la darba t-tigrija tkun ghaddiet se jghaqqdu lil kulhadd warajhom, u li se jmexxu tim wiehed u maghqud.

Sal-5 ta’ Gunju Abela, Bartolo, Coleiro Preca, Falzon, u Muscat iridu jibaghtu messagg car li dan l-impenn hekk kbir li qed jidhlu ghalih, kemm-il darba ma jkunux huma l-mexxej, xorta wahda jaghtuh lill-partit.

Sal-5 ta’ Gunju Abela, Bartolo, Coleiro Preca, Falzon u Muscat iridu jibaghtu sinjal car li ikun min ikun minnhom Mexxej, se jkun lest li juza t-talenti kollha ta’ shabu l-kontesanti.

Sal-5 ta’ Gunju…u iktar u iktar wara l-5 ta’ Gunju… li l-ahjar kwalitajiet ta’ Abela, l-ahjar kwalitajiet ta’ Bartolo, l-ahjar kwalitiajiet ta’ Coleiro Preca, l-ahjar kwalitajiet ta’ Falzon u l-ahjar kwalitajiet ta’ Muscat jigu assorbiti mill-Mexxej il-gdid. Idealment, il-Mexxej il-gdid ghandu jkun kunjomu Abbacofamu. Idealment fil-Mexxej il-gdid ghandna naraw l-aqwa ta’ ABela, imhallta ma l-aqwa ta’ BArtolo, infilsati ma l-aqwa ta’ COleiro Preca, imdahhla ma l-aqwa ta’ FAlzon, u maghguna ma l-aqwa ta’ Muscat. U dan jista jsir jekk kull wiehed u wahda mill-kontestanti jibaghtu sinjali cari minn issa li l-ahjar taghhom se jkunu disposti li joffruh lil, u jitrasferuh fuq, il-Mexxej il-gdid, ikun min minnhom ikun.

Il-Laburisti kollha… dawk genwini…dawk li vera jhobbu lill-partit mhux ghal xi interess jew iehor…dan qed jistennewh bi dritt. Iridu lil Abbacofamu mexxej. Ejja naghtuhulhom.

Fil-Mellieħa

2008-07-13T15:15:00.008+02:00

03 ta' Mejju 2008

Is-Sindku l-gdid tal-Mellieha, is-Sur Robert Cutajar, ghandu x-xorti li jekk irid ifittex mudell ta’ Kunsill tajjeb u effettiv m’ghandu ghalfejn iterraq ruhu imkien ghajr ihares lejn il-Kunsill Lokali precedenti tal-Mellieha, u jadottah bhala mudell. Ghandu wkoll il-lussu li persuna tant abbli, mahbuba, u ta’ esperjenza bhall-ex Sindku John Buttigieg ghadu attiv fil-Kunsill u dispost ikompli jaghti sehmu ghall-ahjar gid tal-lokalita’.

Titkellem ma min titkellem, inkluz dirigenti u esponenti ewlenin Nazzjonalisti, jikkomfermawlek li l-Kunsill Lokali precedenti tal-Mellieha kien wiehed mill-aktar Kunsilli li rnexxew, u li John Buttigieg kien wiehed mill-ahjar Sindki li qatt ipproduca dan il-pajjiz. Dan mhux biss ghax hadem b’ghaqal kbir u gharaf isarraf dan f’rizultati, imma wkoll ghaliex gharaf jadotta maturita’ politika billi uza t-talenti u l-esperjenza tal-Kunsilliera kollha li kellu ghad-disposizzjoni tieghu, huma min huma, u gejjin minn liema partit gejjin.

Jekk xejn, il-beneficcji ta’ din l-atitudni matura mhux biss kien rifless fix-xoghol li twettaq, imma gie rifless ukoll fir-rizultat ta’ l-ahhar elezzjoni tal-Kunsill. Dan ghaliex ir-residenti tal-Mellieha taw l-akbar numru ta’ l-ewwel preferenza taghhom kemm lill-maggoranza Laburista, kif ukoll esprimew mill-gdid l-akbar fiducja fil-hiliet u l-abbiltajiet ta’ John Buttigieg billi rregalawh bl-akbar ammont ta’ voti. Madankollu, minhabba kif gew trasferiti l-voti, u minhabba numru qawwi ta’ voti mhux trasferibbli, il-minoranza Nazzjonalista, skond ir-regoli tal-loghba, spiccat hadet il-kontroll tal-Kunsill b’sittax-il vot u Robert Cutajar, kontra kull mistenni, spicca Sindku.

Li hu zgur hu li r-residenti tal-Mellieha bil-vot taghhom fl-ebda hin ma baghtu messagg li b’xi mod tista tinterpretath li riedu jarmu lil John Buttigieg il-bahar. Anzi bil-maqlub. Ghaldaqstant ftit taghmel sens, jekk mhux ghax iddettata minn mentalita tribali tal-qamel, id-decizjoni tas-Sindku Cutajar li fl-allokazzjoni tad-doveri lill-Kunsilliera ma hax in konsiderazzjoni l-hiliet u l-esperjenza ta’ Buttigieg. Fil-fatt lil dan warrbu u remieh billi l-kwalitajiet tajbin li ghandu m’ghamilx uzu minnhom. Tah l-inqas responsabbiltajiet li seta. U pprova, minghalih, jumiljah billi offrielu biss it-tindif pubbliku.

Jekk xejn, persuna li ghandha 25 sena esperjenza bhala ghalliem u maghhom tlett snin bhala Assistent Kap ta’ skola, kont noffrilu l-Edukazzjoni. Mela l-gbir taz-zibel? Fil-Kunsill precedenti, Buttigieg, ghax ragel fuq l-irgiel, lil Cutajar (li hu gurnalista sportiv) kien offrielu l-Isports u z-Zghazagh. Imma Cutajar irreciproka, ta’ persuna partiggjana li hu, billi lil Buttigieg, minghajr konsultazzjoni ta’ xejn, impona fuqu l-qasam tal-gbir taz-zibel. Imbaghad lil Clayton Bartolo, kunsillier zaghzugh, tah l-emigranti u l-kunsumatur. Hallina Sur Cutajar! Lil min trid iddahhak? M’intix tinduna li qed titfa l-arlogg hamsin sena lura? Iva, l-atitudni tieghek mhi xejn ghajr atitudni immuffata ddettata minn mohh tribali u partiggjan.

Basta, Sur Cutajar, il-Prim Ministru, li int suppost tahdem Kastilja mieghu, appella lis-Sindki, fic-cerimonja tal-hatra tal-kunsilliera, biex jutilizzaw lill-kunsilliera taghhom fl-oqsma li l-aktar jistghu jaghtu sehemhom fih. U int, Robert Cutajar, il-mimmi ta’ ghajnejn il-Prim, tkun l-ewwel wiehed li turi fil-berah li dak li qal il-Prim qalu biss ghall-konvenjenza. Ghall-gallerija. Paroli fil-vojt. Dahk fil-wicc.

Kun af li dak li ghamilt int hu kollu kemm hu hela ta’ rizorsi, hela ta’ hiliet, hela ta’ esperjenza, u mossi li ma jaghmlux gieh lilek li ghamilthom u lill-partit li tirrapprezenta. Ghandhom ragun quddiem din il-hela kollha r-residenti tal-Mellieha jhossuhom inkorlati u disgustati. Int, is-Sindku l-gdid tal-Mellieha, li qed timmira li titla hafna aktar ‘il fuq fil-karriera politika, nghidlek jien li bdejt l-karriera politika tieghek fuq nota tassew negattiva, habib. Fadallek hafna x’titghallem. Lanqas int stess ma taf kemm. U l-ewwel haga li trid titghallem hi li r-rispett la tixtrih, la takkwistah u lanqas tirbhu. Ir-rispett tiggwadanjah. Tiggwadanjah bix-xoghol, bis-sens ta’ rgulija li timxi biha ma haddiehor, u billi ma thallix il-poter jitla’ ghal rasek.

Huwa ghalhekk li John Buttigieg baqa dejjem rispettat. U nappellalek, habib, hares lejh u tghallem.

Biex insiru eleġibbli

2008-07-13T14:58:00.009+02:00

19 ta' April 2008

Fl-ahhar artiklu tieghi ktibt li l-Partit Laburista huwa obbligat li jaghmel ezami twil tal-kuxjenza u jistaqsi ghaliex qieghed jitlef elezzjoni wara ohra. Ktibt li huwa obbligat jiskopri kif anki meta l-htiega tal-bidla kienet tinhass daqstant, il-maggoranza ta’ l-elettorat ghazlet li tibdel erba’ wcuh mill-PN imma mhux lill-PN. Ktibt li l-partit hu obbligat jara wkoll x’kienu l-izbalji li twettqu, ghaliex twettqu u min wettaqhom. Ghidt li dan irid isir b’rispett lejn dawk il-hafna Maltin u Ghawdxin li, ghal snin twal issa, hassewhom aghar minn barranin f’pajjizhom. Sfaw moghtija l-genb, imwarrbin, u diskriminati. U ara tahsbu li r-rebha li rregalajnielhom, billi kienet wahda marginali, se tibdel xi haga. Jew bidlet xi haga. Xejn. Baqghu l-istess. Baqghu bil-politika tribali jivvantaggjaw lil-certi nies u jwarrbu ohrajn. Naf diga b’kazi ta’ nies ‘inkapaci’ li avvanzaw a skapitu ta’ min hu ‘kapaci’. Naf min twarrab mhux ghax ghandu xi nuqqasijiet…imma ghax jemmen fhiex jemmen. U naf b’kazi wkoll ta’ transfers vendikattivi. Fl-interess ta’ dawn, u fl-interess ta’ min f’dan il-pajjiz jixtieq li l-affarijiet isiru sew, hemm bzonn li ssir harsa sew fil-gewwieni tal-Partit Laburista halli jissaffa mit-tbajja li ghandu u jerga jsir elegibbli

Fl-ahhar artiklu, bl-intenzjoni li nixpruna diskussjoni, ghamilt numru ta’ mistoqsijiet. Illum se nipprova nibda diskussjoni fuq uhud minnhom. Staqsejt ‘ghaliex m’ahniex nattiraw nies godda lejna? Ghaliex nies li kienu maghna qed jisthu jergghu lura? Ghaliex nies godda qed jibzghu jersqu lejna? Ghaliex dan il-partit, li l-ideat u l-ideali tieghu kienu jigbdu lejh l-immaginazzjoni tal-generazzjoni zaghzugha fil-passat, qed isibha tant difficli biex jattira lejh iz-zghazagh tal-lum?’

Ir-rizultati elettorali jitkellmu car hafna. Elezzjoni wara ohra il-Partit Laburista mhux qed jirnexxielu jikber. Qed jibqa fejn ikun. Ifisser li nies godda, zghazagh, u nies li kienu telquna mhux jersqu lejna. Fil-verita’ pero nahseb li filwaqt li wiehed ghandu jfittex ir-raguni ghaliex qed jigri dan, kemm jekk hemmx nuqqas f’dak li hu kontenut kif ukoll f’dik li hija dehra, nahseb li wiehed ghandu jistaqsi l-iktar jekk ahniex naghmlu bizzejjed biex nersqu ahna lejn dawn in-nies. Jigifieri l-mistoqsija ghandha tinqaleb. Mhux jekk hux jersqu huma lejna, imma ghaliex m’ahniex naghmlu l-almu kollu taghna biex nersqu ahna lejn dawn in-nies? Jekk il-muntanja ma tigix….tmur int lejn il-muntanja. U fil-verita’, jekk wiehed ifittex sew isib li m’ghamilna xejn, jew ftit li xejn, biex nersqu ahna. Fi kliem iehor, ma kienx hemm pjan ta’ ‘evangelizzazzjoni’ iffukat tajjeb biex jolqot lil dawn in-nies. Ma hdimniex bizzejjed biex nersqu lejn aktar nies ghax stennejna li jkunu n-nies li jersqu lejna.

Fl-opinjoni tieghi, bl-iskop li tersaq lejn aktar nies l-ewwel jinhtieglek li tkun taf sew lin-nies. X’isawwar hajjithom? X’inhi l-qaghda socjo-ekonomika taghhom? X’inhuma l-aspettattivi godda taghhom? Dan jista jsir billi l-partit jiehu x’ray ta’ kull lokalita’ billi jikkummissjona studji li jaghtuh stampa korretta tas-sitwazzjoni demografika ta’ kull lokalita, il-qaghda socjo-ekonomika tan-nies li jghixu fiha, u l-ambjent li jghixu fih. Isegwi dawn l-istudji programm qawwi ta’ kuntatt man-nies, imbaghad a bazi tar-rizultanzi li johorgu minn dawn l-ezercizzji jitfassal programm effettiv ta’ hidma politika immirat ghall-bzonnijiet ta’ dik il-lokalita’ u n-nies li jsawwruha. Dan hu ezercizzju li jistghu jaghtu, u ghandhom jaghtu, is-sehem shih taghhom il-Kumitati Lokali. Dettalji precizi ta’ kif haga bhal din tista’ ssir kont pprezentajthom lill-partit, u lill-kumitati tal-partit, xi snin ilu.

Fl-opinjoni fqira tieghi ma tistax tippretendi li n-nies tibda tifhem lilek qabel int bdejt tifhem lilha. Ma tista qatt tippretendi li n-nies tersaq lejk qabel int tersaq lejha. Ma tistax tippretendi li l-muzika li qed toffri int se toghgob il-widna tan-nies meta int ghadek ma tafx xi trid tisma dik il-widna. Wisq iktar ma tistax tippretendi li n-nies se tisma lilek qabel int tkun hrigt ghal kollox barra minn triqtek biex tisma lilha.

Meta nifhmu dan nifhmu wkoll ghaliex wara ghoxrin sena fl-Opposizzjoni l-maggoranza ta’ l-elettorat baqa’ jarana bhala partit tajjeb bizzejjed ghall-Opposizzjoni imma mhux tajjeb bizzejjed bhala Gvern. Meta nifhmu dan nifhmu ghaliex kien hemm aktar minn 20,000 persuna li skartaw id-dritt taghhom li jivvutaw, ghax akkost ta’ kollox ma riedux lill-PN fil-Gvern, imma mhux akkost li nitilghu ahna fil-Gvern .

Meta naghmlu dan l-ezercizzju nibdew nifhmu ghaliex mas-7,000 vot ‘laburist’ li ghazlu PN fl-2003 minhabba l-kwistjoni ta’ l-Unjoni Ewropeja baqghu ma rritornawx fid-dar naturali taghhom. Ma baqghux mal-PN imma ma hassewhomx komdi jirritornaw lura f’darhom. U insiru nafu biss ghalxiex meta nidentifikawhom u inkellmuhom wiehed wiehed.

Meta naghmlu dan l-ezercizzju nibdew nifhmu ghaliex dan il-partit kbir mhux qed ikun kredibbli. X’hemm x’izommu milli jerga jibda jirbah il-qlub u l-imhuh tal-maggoranza tal-Maltin u l-Ghawdxin. U ngharfu nindirizzaw din il-problema.

Fl-opinjoni umli tieghi rridu ngharfu nuzaw ir-rizorsi umani kollha tajbin li ghandna. Hlejna wisq hin miz-zmien prezzjuz ta’ l-Opposizzjoni. U ssagrifikajna hafna mit-talenti li kellna kapriccjozament.

Irridu nuzaw b’mod aktar professjonali l-mezzi ta’ komunikazzjoni li ghandna u nizviluppaw ohrajn godda. Pero naraw li dawn bihom nersqu lejn in-nies mhux innaffru u nbezzghu lin-nies.

Ghal-lum nieqaf hawn. Inkompli naghti kontribut b’fehmti bhal-lum hmistax, ghax mil-lum se nibdew niltaqghu nhar ta’ Sibt minflok nhar ta’ Tlieta.

Għaliex... Kif?

2008-07-13T14:38:00.012+02:00

08 ta' April 2008

Il-Partit Laburista huwa obbligat li jaghmel ezami twil tal-kuxjenza u jistaqsi ghaliex qieghed jitlef elezzjoni wara ohra anki dawk li suppost ikunu prezentati lilu fuq platt tal-fidda. Il-Partit Laburista huwa obbligat jiskjopri kif anki meta l-htiega tal-bidla kienet tinhass ma kullimkien, il-maggoranza ta’ l-elettorat ghazlet li taghti dirsa lil hafna mill-esponenti tal-PN u mhux lill-PN innifsu. Irid jiskopri l-MLP ghaliex id-dnubiet mejta li jaghmlu l-esponenti tal-PN ma jirriflettux hazin fuq il-PN, imma fuq l-individwu, mentri dnubiet ta’ esponenti Laburisti, anki dawk imwettqa ghoxrin u hamsa u ghoxrin sena ilu, jibqa jgorrhom il-partit. Obbligat jara wkoll l-partit x’kienu l-izbalji li twettqu, ghaliex twettqu u min wettaqhom. Dan l-ezercizzju jrid isir jekk xejn fl-interess ta’ hafna u hafna Maltin u Ghawdxin li ghal 20 sena shah, u hamsa ohra maghhom minn issa sa elezzjoni ohra,…kwart ta’ seklu… hassewhom cittadini tat-tieni klassi ghaliex sfaw moghtija l-genb, imwarrbin, u diskriminati. U kienu qed jistennew li jkun hawn Gvern li lilhom mhux jittrattahom ahjar min haddiehor, imma daqs haddiehor.

Bl-intenzjoni li nixpruna diskussjoni li taghti rizultat u mhux biex inkun parti minn ezercizzju ta’ swat fuqna nfusna…se naghmel numru ta’ mistoqsijiet li jixirqilhom ftit tar-riflessjoni.

 Ghaliex wara ghoxrin sena fl-Opposizzjoni l-maggoranza ta’ l-elettorat baqa’ jarana bhala partit tajjeb ghall-Oppozizzjoni u mhux bhala partit tajjeb bizzejjed ghall-Gvern?

 Ghaliex kien hemm aktar minn 20,000 persuna li skartaw id-dritt taghhom li jivvutaw? Ghaliex minn dawn l-eluf kollha il-Partit Laburista ma kienx kapaci jattira lejh imqar 5% li kienu jkunu bizzejjed ghalih biex jirbah il-Gvern? Aktar minn 20,000 persuna akkost ta’ kollox ma riedux lill-PN fil-Gvern. Imma mhux akkost li jitla fil-Gvern l-MLP. X’qed iwerwirhom fl-MLP?

 Ghaliex nies godda qed jibzghu jersqu lejna? Ghaliex dan il-partit, li l-ideat u l-ideali tieghu kienu jigbdu lejh l-immaginazzjoni tal-generazzjoni zaghzugha fil-passat, qed isibha tant difficli llum biex jattira lejh iz-zghazagh tal-lum?

 Ghaliex m’ahniex nattiraw nies godda lejna? Ghaliex nies li kienu maghna qed jisthu jergghu lura maghna?

 Fil-vot Nazzjonalista ta’ l-2003 kien hemm mas-7,000 vot ‘laburist’ li ghazlu PN minhabba l-kwistjoni ta’ l-Unjoni Ewropeja. Din id-darba bil-kwistjoni ta’ l-U.E., qatt ma tkun issue, u b’dawn is-7,000 persuna jintebhu li bil-vot taghhom fl-2003 ikkontribwixxew ghal Gvern li sar arroganti u li abbuza mill-poter, hafna minnhom ma regghux geddew il-fiducja taghhom fil-PN. Pero lanqas irritornaw lura fil-familja naturali taghhom. Allura nistaqsi ghaliex hafna minn dawn is-7,000 persuna ma gewx lura? Ghaliex dawn telqu lill-PN imma ma hassewhomx komdi jirritornaw lura f’darhom? X’hemm iwerwirhom?

 Ghaliex dan il-partit kbir mhux qed ikun kredibbli? X’hemm x’izommu milli jerga jibda jirbah il-qlub u l-imhuh tal-maggoranza tal-Maltin u l-Ghawdxin?

 Hemm esponenti fil-partit li aktar jinteressahom li jistaghnew huma milli li jkunu difensuri tassew ta’ dawk li huma skomdi? L-istil ta’ hajja li qed jghixu whud mill-esponenti jirrifletti stil ta’ hajja li tressaq lejha l-akbar ammont ta’ nies?

 Il-mezzi ta’ komunikazzjoni tal-partit qieghdin jintuzaw tajjeb? Jew forsi kultant qed jitqiesu bhala odjuzi zzejjed?

 Qed nuzaw ir-rizorsi umani kollha tajbin li ghandna? Jew forsi hemm min kien jintertessah jizola lil min ried jaghti daqqa t’id ghax kien aktar jinteressah li jipprotegi gildu.

 Il-fondi li jingabru kif kienu qed jintefqu? Il-kampanja elettorali li ghaddiet bl-ebda tigbid ta’ immaginazzjoni ma tersaq lejn il-figuri migbura ghaliha.

 Ghaliex il-partit li f’Malta dahhal il-hniena socjali, li qered id-divizjoni socjali, li ressaq lill-fqir lejn is-sinjur, li introduca l-edukazzjoni u l-kura tas-sahha b’xejn ghal kulhadd, li integra fis-socjeta’ lill-persuni bi bzonnijiet specjali, li ggieled ghal-liberta’ ta’ l-espressjoni u t-tolleranza, li ntroduca d-dritt ta’ l-assocjazzjoni, li ta d-dinjita` lill-mara u sehem liz-zghazagh fid-decizjonijiet, qed jigi kkunsidrat bhala ‘jaqq’ anki minn uhud minn dawk li gawdew mill-hidma socjali tieghu?

Dawn il-mistoqsijiet u aktar ghandhom jigu imwiegba minnufih. Immedjatament wara ghandu jinstab mezz kif se jigu indirizzati. Ikun kollu inutli li noqghodu nahsbu lil min se nipprezentaw quddiem l-elettorat jekk ma jigux imwiegba dawn il-mistoqsijiet. Qabel wiehed ikompli jistaqsi min, ikun ahjar li naraw ghaliex u kif.